Созмони байнулмилалии ҳомии ҳуқуқи Amnesty International (AI) ё худ Афви Байнулмилал хабар дод, ки соли гузашта дар кишварҳои гуногун 883 ҳукми қатл ба иҷро расонида шудааст. Ин маълумот дар гузориши ҳамасолаи “Авфи байнулмилалӣ” рӯзи сешанбе, 16 май нашр шудааст.
Тибқи маълумоти Amnesty International, ки далелҳои истифодаи ҳукми қатлро ҳисоб мекунад, ба теъдоди кушташудагон “ҳазорон” нафарони ба марг маҳкумшуда дар Чин, ки он ҷо омори қатлҳо махфӣ аст, дохил намешаванд.
Дар гузориш зикр мешавад, ки соли гузашта дар Арабистони Саудӣ танҳо дар як рӯз нисбати 81 нафар ҳукми қатл иҷро шудааст. Ин рақам дар санад «ҳайратовар» номида мешавад.
Гуфта мешавад, ҳукмҳои қатл ба таври густарда дар Кореяи Шимолӣ ва Ветнам содир шуда, ба мисли Чин омори ин далелҳо махфианд.
Ҳиссаи нисбатан назарраси иҷрои ҷазои ҳукми қатл ба маҳкумшудагон барои хариду фурӯши маводи нашъаовар ва дигар ҷиноёти марбут ба нашъамандӣ рост меояд. Масалан, соли 2022 дар Сингапур барои ҷиноятҳои марбут ба маводи нашъаовар нисбати 11 кас ҳукми қатл ба иҷро расидааст.
Дар Тоҷикистон аз соли 2005 ба истифодаи чунин ҷазо моратория ҷорӣ шудааст. Моҳи октябри соли 2020 мо дар кӯчаҳои Душанбе як назарпурсӣ гузаронидем ва дар ҷараёни он аксари мардум аз ин қарор ҷонибдорӣ карданд. Чаро тоҷикон мухолифи ҷазои қатл ҳастанд ва дар кадом ҳолатҳои истисноӣ ба истифодаи он иҷозат медиҳанд? Ба гузориши видеоии мо таваҷҷуҳ кунед:
