Чанде қабл сафаҳоти қариб ҳамаи нашрияҳои мустақилро ному аксҳои маҳбуси собиқ Саидалӣ Казаков зеб медод, ки пас аз маҳкумияти 8-сола моҳи октябри соли равон ба озодӣ баромада буд. Ӯ аз қонуншиканиҳо дар маҳбас, тамаъҷӯии кормандони муассисаҳои ислоҳӣ аз зиндониён ва шиканҷаву кирдори бераҳмона дар онҳо ошкоро суҳбат мекард.
Рӯзи сешанбе, 27-уми ноябр Саидалӣ Казаков аз шаҳри Санкт-Петербург ба идораи ОИ «Азия-Плюс» занг зада, изҳор кард, ки ӯ дар ин шаҳр таҳти муолиҷа қарор дошта, афроде бо сарулисбоси мулкӣ ӯро таъқиб мекунанд.
«Ба фикрам, онҳо кормандони «амният» бо сарулибоси мулкианд. Дар бозору дигар ҷойҳои ҷамъиятӣ онҳо ба мардум аксҳои маро нишон дода, аз онҳо мепурснд, ки оё маро дидаанд, зеро ман ба онҳо зарур будаам. Гӯё ман ягон ҷинояткоре буда мавриди пайгардӣ қарор дошта бошам», – мегӯяд Казаков.
Ба қавли вай, пас аз ин ҳодиса наздиконаш ба мақомоти прокуратураи шаҳри Душанбе рафта, онҷо бори дигар итминон ҳосил намудаанд, ки ӯ таҳти ҷустуҷӯ қарор надорад. Ӯ мегӯяд, шояд барои як силсила мусоҳибаҳои ошкоро бо журналистон пас аз озодӣ мавриди таъқиб қарор гирифта бошад.
«Ман аз ҳеҷ касе пинҳон шуданӣ нестам ва пас аз муолиҷа ба Душанбе бармегардам», – иброз дошт Казаков ва таъкид намуд, ки пас аз чанд соли зиндон ба бемории сили шакли пӯшида гирифтор шудааст.
