Суди шаҳри Солнечногорски вилояти Маскав нисбати 3 нафар кормандони шуъбаи кофтукови ҷиноии ҳамин шаҳр Станислав Дейкун, Андрей Чернишев ва Владимир Гордеев, ки дар марги муҳоҷири 39-солаи тоҷик Фаррух Урозов айбдор карда шуда буданд, ҳукм содир намуд.
Ҳамаи онҳо дар баромадан аз ҳадди ваколатҳои мансабӣ ва расонидани зарари вазнин ба саломатӣ, ки ба марги муҳоҷири тоҷик боис гардид, гунаҳкор дониста шуданд. Ҳар кадоме аз онҳо ба 7,5 соли зиндони низомаш шадид маҳкум шуданд.
Бародари марҳум Илҳом Алихонов изҳор доштааст, ки ҳукм нисбати кормандони пулисро сабук мешуморад. «Дар муқоиса бо даҳҳо нафар тоҷикон, ки дар Русия кушта мешаванду гунаҳкорон аз муҷозот озод мемонанд, мо бо кумаки Кумитаи зидди шиканҷаи Русия тавонистем, ки онҳоро ба ҷавобгарӣ ҷалб намоем. Албатта, онҳо аз болои ҳамин ҳукми сабук низ шикоят бурда, кам кардани муҳлати ҷазоро талаб мекунанд, вале ҳама коре, ки аз дастам меомад, ман анҷом додам», – гуфтааст ӯ.
Номбурда ҳамчунин зикр кардааст, ки айни замон барои ӯ ҳаллу фасл кардани масъалаи пардохти ҷубронпулӣ ва тарбияву ба воя расонидани кӯдакони хурдсоли бародари марҳумаш хеле муҳим аст.
Ёдрас мекунем, ки
зимни мурофиаи судии ахир
айбдоркунандаи давлатӣ Анна Евченко дархост намуда буд, ки судшавандагон гунаҳкор эътироф гардида, Дейкун ва Чернишев ҳар кадоме ба 9 соли зиндон ва Гордеев ба 9 солу се моҳи зиндони низомаш шадид маҳкум карда шаванд.
