Дар ҷашни Рӯзи истиқлолияти давлатии Тоҷикистон имсол дар шаҳру навоҳии кишвар бо мақсади пешгирӣ аз сиряти коронавирус намоишҳои анъанавии театришуда, сайругаштҳои оммавӣ ва консертҳои идона баргузор намешаванд.
Тавре ба “Азия-Плюс” як манбаъ аз ҳукумати ҷумҳурӣ хабар дод, имсол дар маҷмааи “Наврӯзгоҳ”-и пойтахт чорабинии маъмулии идона бо иштироки ҳунармандони шинохтаи кишвар доир намегардад.
Ба гуфтаи манбаъ, шароити имсолаи вобаста ба пандемияи коронавирус талаб мекунад, ки чорабиниҳо бо иштироки издиҳоми мардум ва сайругаштҳои оммавӣ маҳдуд карда шавад.
Дар сурати баргузор намудани ҷашнҳо ба ин муносибат аз ҷониби корхонаҳо риояи қатъии меъёрҳои санитарӣ тақозо мегардад.
Ёдрас мекунем, ки 9 сентябр дар Тоҷикистон 29-умин солгарди Рӯзи истиқлолияти давлатии ҷумҳурӣ ҷашн гирифта мешавад.
Қобили зикр аст, ки то ин дам дар Тоҷикистон 8 ҳазору 346 ҳолатҳои сироятёбӣ аз коронавирус ба қайд гирифта, шумори фавтидагон аз ин беморӣ дирӯз ба 67 нафар расид. Дар ин давра 7 ҳазору 142 нафар аз ин беморӣ шифо ёфта, беш аз 1 ҳазор нафари сироятёфтагон дар кишвар дар хонаҳояшон муолиҷа мегиранд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
