Масъалаи марбут ба бори тоҷирони Тоҷикистон, ки дар Чин дармондаанд, зери назорати ҷиддии сохтори мост, гуфт имрӯз зимни нишасти хабарӣ вазири корҳои хориҷии ҷумҳурӣ Сироҷиддин Муҳриддин.
“Мо вохӯриҳо доштем. Ҷониби Чин дар сарҳад барои поккорӣ (дезинфексия)-и мошинҳо нуқта месозад. Тавре ҳукумати Чин ба мо изҳор дошт, сохтмони ин нуқта бояд охири моҳи феврал ба анҷом расад”, – гуфт вазир.
Сироҷддин Муҳриддин ҳамчунин хотиррасон намуд, ки ҳозир дар Чин таътили солинавӣ ҷараён дорад.
Қаблан раиси Палатаи савдо ва саноати Тоҷикистон Ҷамшед Ҷумъахонзода воридкунандагони молу маҳсулот аз Чинро аз ҷумлаи бештар зарардидагон аз оқибатҳои пандемия номид.
Номбурда қайд кард, ки ширкатҳо ва соҳибкорони инфиродӣ айни замон аз бозистии интиқоли молу маҳсулоташон аз Чин зиёни зиёд мебинанд.
Ба гуфтаи ӯ, молу маҳсулоте, ки бояд ба Тоҷикистон оварда шавад, аз моҳи октябри соли гузашта дар сарҳади Чин дармондаанд.
Раиси Палата, сабаби асосии иҷоза надодани интиқоли молу маҳсулотро аз Чин пандемияи коронавирус унвон кард.
Ӯ изҳори умедворӣ кард, ки пас аз анҷоми Соли нави Чин молу маҳсулоти соҳибкорони ватанӣ ба Тоҷикистон оварда мешаванд.
Мутахассисони ПСС мегӯянд, айни замон дар дигар кишварҳои ҳаммарз бо Чин низ чунин мушкилӣ вуҷуд дорад, зеро ин давлат қоидаҳои риояи меъёрҳои санитарӣ-эпидемиологиро ҳангоми интиқоли бор сангинтар кард.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
