Мувофиқи маълумоти Хадамоти гумруки ҷумҳурӣ, соли 2020 Тоҷикистон ба маблағи 44,3 млн доллар зиёда аз 204 ҳазор тонна нуриҳои минералӣ ворид кардааст.
Чанд рӯз пеш зикр гардид, ки ягона корхонаи исстеҳсолкунандаи нуриҳои минералӣ дар ҷумҳурӣ – “Тоҷик Азот” дар тендер (музояда) фурӯхта шуд. Номи моликони он ифшо нашуд.
Бо қатъи фаъолияти ин корхона аз соли 2009, Тоҷикистон ҳамасола ба маблағи аз 50 то 100 млн доллар нуриҳои минералиро аз Русияву Қазоқистон ва Ӯзбекистон мехарад.
Вазорати кишоварзии ҷумҳурӣ хабар медиҳад, ки имсол дар Тоҷикистон киштукори 856 ҳазору 822 гектар заминҳо пешбинӣ шудааст.
Барои ҳосили хуб ба даст овардан, ҳадди ақал зиёда аз 600 ҳазор тонна нуриҳои минералӣ лозим буда, лекин воридот пурра талаботи бахши кишоварзиро қонеъ намекунад.
Умедворӣ ба “Тоҷик Азот”
Зимни нишасти хабарии чанде қабл вазири кишоварзӣ Сулаймон Зиёзода бо таваҷҷуҳ ба ин масъала изҳор намуд, ки масъалаи барқарор намудани фаъолияти ягона корхонаи истеҳсоли нуриҳои минералӣ – “Тоҷик Азот” ба наздикӣ ҳал мешавад.
Раиси Кумитаи давлатии сармоягузорӣ ва идораи амвол Саъдӣ Қодирзода дар нишасти хабарии ниҳодаш дар ин робита зикр намуд, ки корхона дар музояда фурӯхта шуда, арзиши саҳмияҳояш 200 млн долларро ташкил медиҳад.
Ӯ қайд кард, ки “Тоҷик Азот” бо мақсади ҷалби сармоягузории хориҷӣ ба кишвар ва фароҳам сохтани ҷойҳои нави корӣ фурӯхта шуд.
ИЗОБРАЖЕНИЕ Ягона корхонаи истеҳсолкунандаи нуриҳои минералӣ дар ҷумҳурӣ чандин сол инҷониб кор намекунад
Бино ба маълумоти ҳукумат, ғолиби тендер ба дар ихтиёр доштани саҳмияҳо ҳуқуқ пайдо намуда, харидор ба анҷоми корҳои барқароркунӣ дар хати лӯлаи гази Ёвон – Левакант дар муддати се сол уҳдадор мешавад, то ки сӯзишвории заруриро барои истеҳсолот аз Ӯзбекистон дастрас карда тавонад.
Тибқи созишномаи пешин бо намояндагони Чин дар назар буд, ки пас аз таъмиру навсозии корхона иқтидори он ба истеҳсоли 1,5 млн тонна расида, маҳсулот ба Афғонистону Қирғизистон низ фурӯхта мешавад.
Нархҳо боло мераванд
Дар ҳамин ҳол, нархи нуриҳои минералии асосӣ – селитра ва карбамид дар Тоҷикистон боло рафта, ҳозир 1 килои онҳо 4,5-5 сомонӣ нарх дорад. Як моҳ пеш онҳо 3,5-3,7 сомонӣ арзиш доштанд.
Дар ин робита кишоварзон изҳори нигаронӣ карда, мегӯянд, дар оғози мавсими киштукор нархҳо ба ин маҳсулот бояд зери назорат гирифта шаванд.
Бахтиёр Муродов, фермер аз ноҳияи Рӯдакӣ савол медиҳад, ки чаро то ин дам ҳукумат дар бораи бунёди корхонаҳои нави истеҳсоли нуриҳои минералӣ дар ҷумҳурӣ фикр намекунад.
“Корхонаи “Тоҷик Азот” аз даст ба даст гузашта, ҳеҷ наметавонад, ки истеҳсолоташро ба роҳ монад ва аздусар талаботи сол то сол афзояндаи бахши кишоварзиро пурра қонеъ карда наметавонад”, – чунин мешуморад ӯ.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
