Президенти Тоҷикистон Эмомалӣ Раҳмон дар доираи сафари расмӣ ба Эрон рӯзи 30 май бо як қатор шахсони расмии Ҷумҳурии исломии Эрон дидору гуфтушунид кард.
Тавре ки хадамоти матбуоти сарвари давлат хабар медиҳад, зимни мулоқот бо раиси Маҷлиси Шӯрои исломӣ Муҳаммад Боқири Қолибоф масоили таъмини сулҳу субот дар минтақаи Осиё, аз ҷумла Афғонистон баррасӣ шуд.
ИЗОБРАЖЕНИЕ Эмомалӣ Раҳмон ва Муҳаммад Боқири Қолибоф
Дар ҷараёни вохӯрӣ бо Раҳбари Инқилоби Ҷумҳурии Исломии Эрон Оятуллоҳ Сайид Алӣ Хоманайӣ низ ба масоили таъмини амният таваҷҷуҳ зоҳир шуд.
Президенти ҷумҳурӣ таъкид дошт, ки Тоҷикистон ҳамеша ҷонибдори тавсеаи рӯзафзуни робитаҳои гуногунарсаи ду кишвар дар руҳияи ҳусни тафоҳум, ҳамёрӣ, эҳтиром ва эътимоди байниҳамдигарӣ мебошад.
Зимни баррасии масоили амниятӣ масъалаҳои таҳкими ҳамкории кишварҳо дар мубориза бар зидди терроризм, ифротгароӣ, қочоқи силоҳ ва маводи мухаддир, ҷиноятҳои муташаккили фаромиллӣ ва вазъи Афғонистон муҳокима гардид.
Зимни гуфтушунид бо Муовини аввали Президенти Ҷумҳурии Исломии Эрон Муҳаммад Мухбир ҷонибҳо аз дастовардҳои назарраси ҳамкорӣ давоми 30 соли робитаҳо изҳори қаноатмандӣ карда, барои амалисозии тавофуқоти қаблан бадастомада, таъмини татбиқи амалии онҳоро зарур шумурданд.
Ҷонибҳо барои расидан ба ҳадафҳои созанда ба масъалаи татбиқи Барномаи дарозмуддати ҳамкориҳои иқтисодиву тиҷоратӣ то соли 2030, ки дар ҳошияи мулоқоту музокироти сатҳи олии имрӯза ба имзо расид, ҳамчунин ҷоннок кардани фаъолияти Комиссияи муштараки ҳамкориҳои тиҷоратӣ, иқтисодӣ, техникӣ ва фарҳангии байни Тоҷикистону Эрон таваҷҷуҳ зоҳир карданд.
ИЗОБРАЖЕНИЕ Эмомалӣ Раҳмон ва Муовини аввали президенти Эрон Муҳаммад Мухбир
Таъсиси корхонаҳои муштарак дар соҳаҳои саноати сабуку хӯрокворӣ, металлургия, коркарди маъдан, мошинсозӣ, кимиё, дорусозӣ ва истеҳсоли масолеҳи сохтмонӣ, шиша ва кошин аз самтҳои дигари судовар барои ҳарду кишвар номида шуд.
Таъкид шуд, ки рушди ҳамкорӣ дар самти роҳандозии коркарди нахи пахта, пӯст, пашм ва абрешим то маҳсулоти ниҳоӣ, инчунин қолинбофӣ, таъсиси корхонаҳои муштараки коркарди меваю сабзавот, намаки ошӣ, истеҳсоли равғани растанӣ ва оби ошомиданӣ низ ба манфиати ҷонибҳо хоҳад буд.
Ҳамкорӣ дар бахшҳои чорводорӣ, паррандапарварӣ, моҳипарварӣ, таҷҳизот ва техникаи кишоварзӣ аз самтҳои дигари муфид барои рушди робитаҳо маънидод карда шуд. Дар ҷараёни мулоқот ҷонибҳо ҳамчунин оид ба таҳкими ҳамкориҳо дар соҳаҳои тандурустӣ, сайёҳӣ, алалхусус сайёҳати тандурустӣ табодули андеша карданд.
Ёдрас мекунем, ки чанде пеш дар Теҳрон аз рӯи натиҷаҳои гуфтушуниди ҳайатҳои Тоҷикистону Эрон дар сатҳи олӣ дар ҳузури сарони кишварҳо Эмомалӣ Раҳмон ва Сайид Иброҳим Раисӣ 16 санади нави ҳамкорӣ имзо шуд.
