Се нафар толибилмони макотиби таҳсилоти умумии вилояти Суғд даст ба худкушӣ заданд.
Тавре ба ОИ «Азия-Плюс» аз Раёсати корҳои дохилии вилояти Суғд хабар доданд, дар оғили хонаи худ хонандаи синфи 9-уми маҳаллаи аҳолинишини Ғазантараки ноҳияи Ғончӣ Н.Ш. худро ба дор овехтааст.
Ба ин монанд ҳодисаҳо дар ҷамоатҳои Ворухи ноҳияи Исфара ва Шодоби ноҳияи Ашт низ ба вуқӯъ пайвастаанд. Дар ҳарду ҳолат духтарони навраси синфи 11 даст ба худкушӣ задаанд.
Сабабҳои ду ҳодисаи аввалро мақомоти додситонӣ мавриди таҳқиқ қарор додаанд. Дар ҳодисаи сеюм ҷанҷоли оилавиро сабаб медонанд, вале корҳои тафтишотӣ идома доранд.
Бино ба маълумоти Раёсати корҳои дохилии вилояти Суғд, дар зарфи 7 моҳи соли равон дар қаламрави вилоят 141 ҳодисаи даст ба худкушӣ задан (дар ҳамин давраи соли 2010 – 207 ҳодиса) ба қайд гирифта шудааст, ки миёни онҳо 63 нафарашон мардон (соли 2010 – 113 нафар) ва 78 нафарашон занон (соли 2010 – 94 нафар) мебошанд.
