Душанбе. 12-уми декабр. ОИ «Азия-Плюс» – Ному насаби ду шаҳрванди Тоҷикистон, ки бар асари фурӯ рафтани боми як сохтмон дар кӯчаи Староконюшенскийи шаҳри Маскав ҳалок гардиданд, аллакай муайян гардидааст.
Тавре ба ОИ «Азия-Плюс» телефонӣ аз шаҳри Маскав Раиси Ҷунбиши умумирусиягии “Муҳоҷирони меҳнатии тоҷик” Каромат Шарифов хабар дод, инҳо сокинони шаҳраки Норак Камолиддин Ғафурови 26-сола ва Рустам Боймуродзодаи 33-сола мебошанд.
Ба гуфтаи Шарифов, ҳоло кофтукови боз ду нафар шаҳрвандони Тоҷикистон, ки ба эҳтимоли зиёд зери шикастпораҳои бино қарор доранд идома дорад. «Номи яке аз онҳо Кароматулло буда, аз ноҳияи Ваҳдат мебошад», – гуфт Шарифов.
Ёдрас мекунем, ки боми ин манзили қадимии 6-ошёна ду рӯз пеш фурӯ рафт. Он замон 6 нафар, аз ҷумла 4 шаҳрванди Тоҷикистон ва 2 шаҳрванди Русия дар дохили бино будаанд. Гурӯҳҳои наҷотбахш аз зери харобаҳои боми фурӯрафта ҷасади шаҳрвандони Русияро низ берун кашидаанд.
