Имрӯз дар боздоштгоҳи Кумитаи давлатии амнияти миллии ҷумҳурӣ мурофиаи судии аввал оид ба баррасии парвандаи соҳибкори маъруф Зайд Саидов баргузор шуд.
Тавре ба ОИ «Азия-Плюс» яке аз адвокатҳои соҳибкор Шуҳрат Қудратов хабар дод, пас аз муаррифии тамоми иштирокчиён мурофиаи аввал ба охир расида, ҷониби ҳимояи судшаванда рад шудани судя ва бардоштани муҳри махфӣ аз парвандаро дархост намуд, вале дар ҳарду ҳолат ҳам посухи рад гирифта шудааст.
Ба қавли адвокат, наздикони судшавандаро ба толори мурофиа роҳ надодаанд. «То рӯзи ҷумъа, 13-уми сентябр суд танаффус эълон намуд», – иброз дошт ӯ.
Қудратов зикр намуд, ки ба парванда муҳри махфӣ гузошта шудааст, зеро дар он баёноти чанде аз мансабдорони давлатӣ мавҷуд мебошанд.
Мурофиа пагоҳ бо бозпурсии судшавандагон – соҳибкор Зайд Саидов ва собиқ директори корхонаи «Тоҷиктекстил» Далер Бобоев оғоз мегардад.
Ёдрас мекунем, ки Зайд Саидов дар содир намудани як қатор ҷиноёти иқтисодӣ ва ҳамчунин таҷовуз ба номуси ноболиғ айбдор карда мешавад.
