Иттифоқи ҷавонони Тоҷикистон (ИҶТ) ба маъракаи интихоботи президентӣ номзади худро пешбарӣ мекунад.
Тавре ба ОИ «Азия-Плюс» муовини раиси ИҶТ-и назди Кумитаи ҷавонон, варзиш ва сайёҳии назди ҳукумати ҶТ Кабирҷон Ҷӯраев хабар дод, дар анҷумани навбатии рӯзи 21-уми сентябри Иттифоқи ҷавонон ба ҷуз натиҷагирӣ аз фаъолият тӯли се сол, ворид намудани тағйирот ба барномаи иттифоқ ва таҳияи нақшаи корӣ барои се соли минбаъда, масъалаи пешбарии номзад ба интихоботи президентӣ аз ҷониби Иттифоқ низ баррасӣ мешавад.
Дар қатори аҳзоби сабтиномшудаи кишвар, Иттифоқи ҷавонони Тоҷикистон низ ба пешбарии номзад дар интихоботи президентӣ ваколат дорад.
Иттифоқи ҷавонони Тоҷикистон ташкилоти мустақили ҷамъиятиву сиёсӣ буда, 12-уми октябри соли 1991 таъсис дода шуд. Мақоми олии ИҶТ анҷумани он мебошад. Шиори ИҶТ – «Барои ваҳдат ва пешравӣ дар Тоҷикистон» аст.
Ёдрас мекунем, ки интихоботи президентӣ дар Тоҷикистон санаи 6-уми ноябр баргузор мешавад. Айни замон аз ҷониби Иттиҳоди нерӯҳои ислоҳотхоҳи Тоҷикистон Ойниҳол Бобоназарова ба сифати номазди ягона ба мансаби президентӣ пешбарӣ шуд. Муддати ҳамин моҳ анҷуманҳои пешазинтихоботии аҳзоби дигар доир гардида, номзадҳояшон эълон карда мешаванд.
