– Мушкилии асосии ҷамъоварии имзоҳо ба ҷонибдории номзад ба мансаби президентӣ Ойниҳол Бобоназарова ба дӯши ҲНИТ вогузор аст, – изҳор намуд имрӯз ба ОИ «Азия-Плюс» раиси ҲСДТ Раҳматилло Зойиров.
Ба гуфтаи раиси ҲСДТ, ба ҷонибдории Ойниҳол Бобоназарова як қатор ташкилоту шаҳрвандони дигар, аз ҷумла намояндагони ҲСДТ низ имзо ҷамъоварӣ карда истодаанд. «Шахсан ман ба ҷонибдории Бобоназарова зиёд имзо ҷамъоварӣ намудам», – гуфт ӯ ва илова намуд, ки «ба ҷараёни ҷамъоварии имзоҳо ҳанӯз 15 рӯз пеш ҳамроҳ шуда буд».
«Шахсан ман ва Шӯрои сиёсии ҳизб дар маҷмӯъ номзадии Бобоназароваро дастгирӣ кардем. Ахзои ҲСДТ дар ҳама ҷо ба ҷамъоварии имзоҳо ба ҷонибдории ӯ машғуланд. Масалан А.Шерзамонов, роҳбари ситод дар ВМКБ, М.Ясавиев ва Ш.Қудратов дар Душанбе имзо ҷамъоварӣ намуда, дар вилояти Суғд низ ин кор ҷараён дорад», – гуфт Зойиров, вале мушаххас нагуфт, ки ин ҷо маҳз дар бораи кадом ситод сухан меравад.
Ҳизби сотсиал-демократии Тоҷикистон то ҳол расман Бобоназароваро номзади худ ба мансаби президентӣ пешниҳод накарда, санаи баргузории анҷумани худро аз рӯзи 6-ум октябр ба вақти дигар гузаронид.
Раҳматилло Зойиров мутмаин аст, ки «изҳороти КМИР дар бораи ба ҷонибдории Бобоназарова имзо ҷамъ оварда натавонистани аъзои ҲСД мутлақо нодуруст аст». «Ҳамаи аъзои ИНИТ ҳамчун ҳама гуна шаҳрванди ҶТ ба ҷамъоварии имзоҳо ба ҷонибдории ӯ ҳуқуқ доранд», – гуфт ӯ дар ин робита.
