Вазорати кишоварзии ҷумҳурӣ нишондиҳандаҳои пешакии ҷамъоварии ҳосили маҳсулоти кишоварзӣ дар соли равонро интишор намуд.
Бино ба маълумоти хадамоти матбуоти вазорат, то охири соли 2014 мувофиқи таҳлилҳо ва кишти гузаронидашуда дар ҳамаи шаклҳои хоҷагидории вилояту шаҳр ва ноҳияҳо ҳосили интизории истеҳсоли ғалладона 1210,8 ҳазор тонна, аз ҷумла гандум 813,8 ҳазор тонна, пахта 366,0 ҳазор тонна, картошка 902,9 ҳазор тонна, сабзавот 1389,2 ҳазор тонна, полезӣ 513,2 ҳазор тонна, мева 340,0 ҳазор тонна, ангур 180,0 ҳазор тонна, гӯшт 167,5 ҳазор тонна, шир 820 ҳазор тонна, тухм 350,8 млн. дона, моҳӣ 1,7 ҳазор тонна, асал 3,6 ҳазор тонна муайян карда шудааст.
«Кишоварзон дар тамоми шаклҳои хоҷагидорӣ маҳсолоти худро ҷамъоварӣ намуда барои фурӯш омода кардаанд. Корхонаву ташкилотҳои дахлдор, идораву муассисаҳо, бозорҳо ва шаҳрвандон метавонанд барои захираи зимистон аз ин маҳсулотҳо бо нархҳои нисбатан арзон харидорӣ намоянд», – қайд мегардад дар маълумот.
Гуфта мешавад, мутахассисони Вазорати кишоварзӣ дар ҳамкорӣ бо олимони соҳа вазъияти норасоии маҳсулоти мевагиву сабзавотро дар фаслҳои зимистону аввали баҳор мавриди омӯзиш қарор дода, лоиҳаи «Барномаи давлатии барқарорсозии яхдону сардхонаҳо барои захираи маҳсулоти тару тозаи кишоварзӣ дар давраи тирамоҳу зимистон дар Ҷумҳурии Тоҷикистон барои солҳои 2015-2019»-ро таҳия намуд ва баъд аз мувофиқа бо вазорату идораҳои дахлдор (вазорати рушди иқтисод ва савдо, адлия, молия, саноат ва технологияҳои нав, Кумитаи давлатии сармоягузорӣ ва идораи амволи давлатии сармоягузорӣ, Иттифоқи «Тоҷикматлубот») ба Ҳукумати Ҷумҳурии Тоҷикистон пешниҳод менамояд.
«Мақсади Барнома — ин паст кардани сатҳи талафот, баланд бардоштани самаранокии истифодабарии захираҳо, оқилона ҷойгир сохтани истеҳсолоти кишоварзӣ, беҳтар намудани таъминоти аҳолӣ бо маҳсулоти тару тозаи кишоварзӣ (меваю сабзавот) дар даврае, ки истеҳсоли онҳо қатъ мегарданд, рушди истеҳсоли маҳсулоти кишоварзӣ (саривақт ва беталаф ҷамъоварӣ гардидани ҳосили рӯёнидашуда ва коркарди он) ва афзун намудани имконияти содиротии маҳсулоти тару тозаи кишоварзии мамлакат мебошад», – зикр мегардад дар маълумоти Вазорати кишоварзӣ.
