Дар доираи нақшаи ягонаи омодагии ҷангӣ ва ҷиҳати иҷрои дастуру супоришҳои Сарфармондеҳи Олии Қувваҳои Мусаллаҳ ҳафтаи равон бо ҷалби ҳайати шахсии афсарону прапоршикони Дастгоҳи марказии Вазорати мудофиа ва Ситоди генералии Қувваҳои Мусаллаҳ таҳти раҳбарии муовинони вазири мудрфиа машғулиятҳои таълимии тирпарронӣ аз навъҳои гуногуни яроқ доир гардид.
Бино ба маълумоти маркази матбуоти Вазорати мудофиаи ҶТ, барои дар сатҳи зарурӣ гузаронидани машқҳо, нуқтаҳои таълимии муҷаҳҳаз бо шароити техникӣ ва дигар лавозимоти ҳарбӣ ташкил карда шуда, нахуст ҳайати шахсии ҷамъомада, дар нуқтаҳои таълимии машқгоҳ ба омӯзиш ва корҳои фаҳмондадиҳӣ фаро гирифта шуданд.
«Афсарони масъул, ки машғулиятҳои таълимиро роҳбарӣ менамуданд, барои дар амал татбиқ намудани тамоми барномаҳои омӯзишӣ, ҳайати шахсии ба ҷамъомад ҷалбгардидаро ба гурӯҳҳо тақсим намуда, аз аслиҳаи оташфишони сабуки ҷангӣ тирпаронӣ намуданд», – омадааст дар иттилои Вазорати мудофиа.
Гуфта мешавад, чунин машғулиятҳо ҷиҳати баланд бардоштани донишҳои ҳарбӣ-сиёсии афсарони ҷавон, мукаммалсозии таҷрибаи мутахассисони соҳа, омӯзишу истифодабарии навъи мухталифи яроқу аслиҳа мусоидат мекунад.
