Кормандони Агентии назорати давлатии молиявӣ ва мубориза бо коррупсияи Тоҷикистондар шаҳри Душанбе командири ротаи таълимии қисми ҳарбии 2613-и Қушунҳои сарҳадии Тоҷикистон, сокини шаҳри Кӯлоб Рустам Сагизовро ба гумони даст доштан дар қаллобӣ боздошт намуданд.
Бино ба иттилои маркази матбуоти Агентӣ, боздоштшуда бо суистифода аз мақоми хизматӣ бо роҳи фиреб ба боварии шаҳрванде бо номи Азимов даромада, барои интиқол намудани ҷиянаш аз қисми низомии Қушунҳои сарҳадӣ дар ноҳияи Ҳамадонӣ ба қисмҳои ҳарбии гарнизони шаҳри Душанбе дар ду ҳолат аз ӯ ба маблағи 600 доллари амрикоӣ пора гирифтааст.
Гуфта мешавад, ин мабалғро ӯ ба эҳтиёҷоти худ сарф карда, бо ин кирдораш ба шаҳрванд Азимов зарари калони моддӣ расонидааст.
Зимнан зикр мегардад, ки қаблан низ ин афсар тибқи моддаи 247-и КҶ ҶТ ба ҷавобгарии ҷиноятӣ кашида шудааст. «Ин дафъа низ дар ҳаракатҳои Рустам Сагизов аломатҳои таркиби ҷинояти дар моддаи 247, қисми-4, банди “б” КҶ Ҷумҳурии Тоҷикистон пешбинишуда дида мешавад. Тафтишот дар ин самт идома дорад», – омадааст дар иттилои Агентии зиддифасод.
