Дар ҷаласаи рӯзи 10-уми октябри Шӯрои байнидавлатии Иттиҳоди иқтисодии Авруосиё (ЕврАзЭС) дар шаҳри Минск сарони кишварҳои Русия, Беларус, Қазоқистон, Қирғизистон ва Тоҷикистон аз кори Иттиҳод натиҷагирӣ карда, Шартномаи қатъи фаъолияти онро аз 1-уми январи соли 2015 ба имзо мерасонанд.
Бино ба маълумоти хадамоти матбуоти Кумитаи иҷроияи ИДМ, давоми 14 соли фаъолият ин созмон дар рушди равандҳои ҳамгиройии минтақаи авруосиёӣ саҳми босазо гузошта, ба ташаккули Иттиҳоди Гумрукӣ, Фазои ягонаи иқтисодии Русия, Беларус ва Қазоқистон ва ҳамчунин баромадан ба сатҳи нави ҳамгиройӣ – таъсиси Иттиҳоди иқтисодии авруосиёӣ муосидат намуд.
Гуфта мешавад, дар нишасти ИДМ дар Минск баррасии масоили рушди ҳамкориҳои бисёрҷониба дар бахшҳои иқтисоду фарҳанг ва мақомоти ҳифзи ҳуқуқ дар назар буда, як қатор созишномаву қарорҳои дахлдор ва ҳамчунин Изҳорот дар бораи таҳкими низоми байнулмилалии назорати маводи мухаддир барои имзо омода мегарданд. Ҳамчунин дар робита ба 70-солагии Ғалаба дар ҶБВ-и солҳои 1941-1945 сарони кишварҳо Муроҷиатнома ба мардуми Иттиҳод ва ҷомеаи ҷаҳонӣ қабул мекунанд.
