Пас аз даргузашти Суҳроб Шарипов, ки аз тарафи Ҳизби халқии демократии Тоҷикистон аз ҳавзаи якмандатии интихоботии Шоҳмансури шаҳри Душанбе номзад ба вакилӣ дар палатаи поёнии парлумон пешбарӣ шуда буд, ҲХДТ аз ин хавза номзадии Баҳром Абдуаминовро, ки мустақилона худро номзад пешбарӣ намудааст, дастгирӣ карданист.
Усмон Солеҳ, мудири шӯъбаи таблиғот, иттилоот ва матбуоти Дастгоҳи КИМ ҲХДТ ба «Азия-Плюс» дар ин робита иттилоъ дод, ки тибқи меъёрҳои қонунгузории ҷумҳурӣ, пас аз фавти Суҳроб Шарифов санаи 19-уми январ, ҲХДТ ба пешбарии номзади дигар ҳуқуқ надошт.
«Номзади худпешбаришуда Баҳром Абдуаминов низ узви ҲХДТ буда, ба ҳайси роҳбари Расати Кумитаи давлатии заминсозӣ ва геодезияи пойтахт фаъолияти дорад», – гуфт ӯ.
Ёдрас мекунем, ки Суҳроб Шарифовро санаи 10-уми январи соли ҷорӣ ҲХДТ аз ҳавзаи якмандатии интихоботии Шоҳмансури шаҳри Душанбе номзад ба вакилӣ дар Маҷлиси намояндагони Маҷлиси Олии ҶТ пешбарӣ намуд. Дар даъвати ҳозираи парлумон низ ӯ ҳамин ҳавзаро намояндагӣ мекард.
Санаи 13-уми январ Ҳизби наҳзати исломии Тоҷикистон аз ҳавзаи якмандатии интихоботии Шоҳмансури пойтахт хатмкардаи Донишгоҳи байнулмилалии Теҳрон ва факултаи фалсафаи Донишгоҳи миллии Тоҷикистон, духтари муасиси ҲНИТ Саид Абуллои Нурӣ, сиёсатшинос Руқия Саидова (Руқия Нурӣ)-ро номзад ба вакилӣ дар палатаи поёнии парлумон пешбарӣ кард.
Ҳамчунин мебояд гуфт, ки аз ҳавзаи якмандатии интихоботии мазкур Ҳизби демократи Тоҷикистон яке аз фаъолони ҳизб, журналист Аҳмадшоҳи Комилзодаро номзад ба вакилӣ дар Маҷлиси намояндагон пешбарӣ кардааст.
