Аввали ҳафтаи равон дар Вазорати тиҷорат ва саноати Ҷумҳурии Ҳиндустон мулоқоти сафир М.Ҷалолов бо муовини аввали вазири тиҷорат ва саноати Ҷумҳурии Ҳиндустон ҷаноби Раҷив К. баргузор гардид.
Бино ба иттилои Вазорати корҳои хориҷии ҶТ, дар рафти вохӯрӣ масъалаҳои ҷорӣ ва дурнамои муносибатҳои дуҷонибаи Тоҷикистону Ҳиндустон дар бахшҳои тиҷорат ва саноат мавриди баррасӣ қарор гирифта, ҳамсӯҳбатон нисбат ба иҷрои бандҳои Протоколи ҷаласаи Комиссияи муштарак оид ба ҳамкориҳои тиҷоратӣ, иқтисодӣ, илмӣ ва техникӣ низ мубодилаи афкор намуданд.
Гуфта мешавад, рӯзи 25 феврали соли 2015 ҳамчунин сафири Ҷумҳурии Тоҷикистон Шералӣ Ҷононов бо Вазири федеролии амнияти озуқаворӣ ва кишоварзии Ҷумҳурии Исломии Покистон Сикандар Ҳаётхон Босан мулокот намуд, ки дар рафти он маҷмӯи масъалаҳои ҳамкории ду кишвар дар соҳаи кишоварзӣ ва амнияти озуқаворӣ баррасӣ шуданд.
