Қариб якуним ҳазор зодагони Ӯзбекистону Тоҷикистон ва Чеченистон барои мубориза бо Давлати исломӣ ба садоқатмандӣ ба ҳаракати «Ҷабҳат ан-Нусра» савганд ёд карданд. Дар ин бора
Радиои Озодӣ
бо истинод ба Маркази мониторинги риояи ҳуқуқи инсони Сурия, қароргоҳаш воқеъ дар Лондон хабар медиҳад.
Қобили зикр аст, ки «Ҷабҳат ан-Нусра» дар қатори Давлати исломии Ироқу Шом дар Тоҷикистон созмони террористӣ эътироф шудааст. «Ҷабҳат ан-Нусра» яке аз воҳидҳои созмони террористии «Ал-Қоида» дар Сурия мебошад. Ғайр аз ин, ба иттилои ин марказ, ҷангиёни гурӯҳи «Муҷоҳирин» низ садоқаташон ба «Ҷабҳат ан-Нусра»-ро изҳор кардаанд.
Ҳамин тариқ, «Ҷабҳат ан-Нусра» дар мубориза бо гурӯҳои тундгарои суннии Давлати исломӣ, ки чанде аз қаламрави Ироқу Сурияро дар ихтиёр дорад, аз ҷангиён дастгирӣ ёфт. Ҷангиёни гурӯҳи «Муҷоҳирин» тақдири мубориза миёни ин гурӯҳҳо барои шаҳри Алеппои Сурияро ҳал карда метавонанд.
«Ҷабҳат ан-Нусра» ба Усома бин Лоден ва раҳбари кунунии Ал-Қоида вафодор монда, як ҷо бо Давлати Исломӣ ё ДОИШ бар зидди артиши Сурия меҷангиданд. Вале баъди ихтилоф дар соли 2013, ин ду гурӯҳ бар зидди якдигар бархостаанд. Намояндагони «Ҷабҳаи ан-Нусра» изҳор доштанд, ки 30 дарсади нерӯҳои он хориҷиён ва аз Аврупову Осиё, Русия ва чеченҳо мебошанд.
