Паҳлавонони тоҷик дар рӯзи дуюми мусобиқаи қаҳрамонии самбои ҷаҳон – 12-уми ноябр, ки дар шаҳри Софияи Булғористон ҷараён дорад, боз як медали биринҷӣ ба даст оварданд.
Бино ба иттилои маркази матбуоти Кумитаи миллии олимпии Тоҷикистон, Ҳамроз Раҷабов дар сабқати самбои варзишӣ дар вазни то 74 кило мақоми севумро соҳиб шуд ва бо медали биринҷӣ сарфароз гашт. Дар ин вазн Олег Бабгоев (Русия), ки дар қувваозмоии ниҳоӣ бар Ливон Нахутсришвили (Гурҷистон) ғолиб шуд, ба унвони қаҳрамони ҷаҳон даст ёфт.
Ёдрас мешавад, ки гуштигирони тоҷик дар рӯзи аввали мусобиқаи қаҳрамонии ҷаҳон, ки дар Булғористон рӯзи ҷумъаи 11-уми ноябр барпо гардид, дар риштаи самбои варзишӣ бо ду медал сарфароз гаштанд. Комроншоҳи Устопириён дар вазни то 90 кило ва Ҷомии Ҳасанӣ дар вазни то 52 кило барои ҷойҳои сеюм бо медалҳои биринҷӣ мукофотонида шуданд.
