Дар шаҳри Страсбурги Фаронса мулоқоти Сафир, Намояндаи доимии Ҷумҳурии Тоҷикистон дар назди Иттиҳоди Аврупо Эркинхон Раҳматуллозода бо Дабири кулли Шӯрои Аврупо Торбёрн Ягланд баргузор гардид.
Ҷаноби Ягланд зимни истиқболи гарм аз мулоқоти худ бо Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон мӯҳтарам Эмомалӣ Раҳмон дар соли 2011 дар қароргоҳи Шӯрои Аврупо ёдовар шуда, равобити ниҳоди худро бо Ҷумҳурии Тоҷикистон, ки гарчанд узви Шӯрои Аврупо нест, пурсамар ва ояндадор хонд.
Зимни сӯҳбати пурмуҳтаво ва мароқовар ҷонибҳо масоили мавриди таваҷҷуҳи тарафайнро, ки ба салоҳиятҳои Шӯрои Аврупо рост меоянд, баррасӣ намуда, дар бораи вазъи кунунӣ ва дурнамои рушди онҳо ибрози назар намуданд.
Ҳангоми сафари расмии мӯҳтарам Ҷаноби Олӣ, Президенти Ҷумҳурии Тоҷикистон дар соли 2011 ба қароргоҳи Шӯрои Аврупо байни ду ҷониб ба имзо расидани Конвенсияи Аврупо оид ба эътирофи мутабодилаи тахассусоти ба маълумоти олӣ иртиботдошта чун рӯйдоди муҳим арзёбӣ гардид ва идомаи ин раванд ба нафъи кор талаққӣ гардид. Таъкид шуд, ки баррасии имконияти имзои Конвенсияи фарҳангии Аврупо боз як иқдоми хубе дар ин самт хоҳад шуд.
Ҷонибҳо ба фаъолиятҳои Комиссияи Аврупоии “Демократия аз тариқи Қонун” (Комиссияи Венетсианӣ) таваҷҷуҳ намуда, онро падидаи хеле хубу мусбат арзёбӣ карданд ва тавсеаю рушди чунин муносиботро байни Суди конститутсионии Тоҷикистон ва Комиссияи Венетсиании Шӯрои Аврупо салоҳ донистанд.
Дабири кулли Шӯрои Аврупо зимни ибрози назари хеш таъкид кард, ки тақвияту тавсеаи ҳамкориҳо байни Тоҷикистону Шӯрои Аврупо ва инчунин Иттиҳоди Аврупо дар мавзуоти мубориза бар зидди ифротгароиву ҳаросафканӣ, пешгирии интишори маводди мухаддир тақозои рӯз аст ва дар ин самт инкишофи ҳамкориҳо байни муассисаҳои марбутаи кишвар ва ниҳодҳои Шӯрои Аврупо (Комиссияи Помпиду) чун рушди муносибот тибқи рӯзномаи кории ду ҷониб муфид хоҳад буд.
Дар фарҷоми мулоқот ҷонибҳо хушбинии хешро нисбати дурнамои мусбии тақвияти иртиботи ду ҷониб иброз намуданд.
