Дар ҷараёни рейди ғайринақшавии кормандони Агентии “Тоҷикстандарт” дар бозорҳои Душанбе беш аз 250 адад сарулибоси мактабие ошкор шуд, ки бе сертификати сифат ва мутобиқат фурӯхта мешуданд.
“Падару модарон ва дигар шаҳрвандон низ аз пастсифат будани мол, аз ҷумла сарулибоси мактабӣ ва дигар асбобу лавозимоти зарурии хониш шикоят карда, мо тасмим гирифтем, ки дар бозору фурӯшгоҳҳои ин навъи молу маҳсулот санҷиши ғайрнақшавӣ доир намоем”, – хабар доданд ба “Азия-Плюс” аз “Тоҷикстандарт”.
Бино ба гуфтаи манбаъ, дар ҷараёни рейд ба ҷуз сарулибоси мактабӣ, ҳамчунин беш аз 7 ҳазор дона дафтар, 300 дона китобҳои дарсӣ ва дигар молҳо низ мусодира шудааст.
“Рейдҳо идома доранд. Мо аз фурӯшандагон сертификати мутобиқат мепурсем ва агар ӯ онро надошта бошад, пас молаш пастсифат ва тариқи қочоқ ворид шудааст. Ба гунаи мисол, зимни рейдҳо китобҳое мусодира шуданд, ки аз китоби асл нусхабардорӣ ва ба фурӯш гузоштаанд”, – гуфтанд дар Агентӣ.
Зимнан зикр шуд, ки нисбати фурӯшандагони қонуншикан мутобиқи Кодекси ҳуқуқвайронкунии маъмурӣ чораҳо андешида шудааст.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.