Ба ҷуз занони ҳомиладор ва модарони ширхорадор, инчунин касоне, ки дар вақти ваксингирӣ дар онҳо коронавирус ошкор шудааст, дигар барои боқимонда шаҳрвандони синни аз 18-сола боло ваксинагирӣ ҳатмӣ аст.
Дар ин бора ба “Азия-Плюс” сардори Раёсати бехатарии эпидемиологӣ, ҳолатҳои фавқулодда ва ёрии таъҷилии Вазорати тандурустии ҷумҳурӣ Наврӯз Ҷаъфаров хабар дод.
“Ин ҳатмӣ аст. Ваксинагирӣ барои ҳамаи аҳолии синни аз 18-сола боло ҳатмӣ аст, ба ҷуз як гурӯҳи муайяни одамон, ки лозим нест. Инҳо занони ҳомиладор ва модарони ширхорадор мебошанд. Ба ин гурӯҳ шахсоне ҳам дохил мешаванд, ки дар давраи ваксинзанӣ аз коронавирус сироят ёфтаанд. Онҳо танҳо бо гузашти шаш моҳ ваксина мегиранд”, – гуфт ӯ.
Ситоди муқовимат бо пешгирии паҳншавии сирояти коронавирус дар Тоҷикистон 3 июл ваксингириро ҳатмӣ эълон кард.
Шахсони синни аз 18-сола боло, ки ваксина нагирифтаанд, бояд ба табиби оилавӣ ё муассисаи тиббии маҳаллӣ муроҷииат намоянд. Ваксинагузаронӣ бепул аст.
Ба савол дар бораи ҳеҷ бемории аксуламал барои ваксинагирӣ надоштану ваксин нагирифтани шахс, Ҷаъфаров посух дод, ки “инро мо ҳал намекунем”.
“Ин масъала дар салоҳияти мо нест, лекин нисбати касоне, ки ваксин намегиранд, алҳол манъ ё маҳдудиятҳои муайян ҷорӣ нашудааст. Дар ҳама гуна ҳолат, ин шахс метавонад бемор шавад, атрофиёнаш, аз ҷумла наздикону пайвандонашро сироят кунад. Магар ҳамин худаш ҷазо нест…”, – афзуд ӯ.
То имрӯз ба Тоҷикистон ду миқдор ваксина аз коронавирус оварда шуд: 192 ҳазор воя (доза)-и ваксинаи AstraZeneca ва 300 ҳазор вояи ваксинаи Coronavac.
Тибқи маълумоти расмии Вазорати тандурустии кишвар, то 5 июл дар маҷмӯъ зиёда аз 300 ҳазор нафар аз Covid-19 ваксина гирифтаанд, ки 97 ҳазорашон сокинони Душанбе мебошанд, лекин ҳамагӣ 18,6 ҳазор нафар аҳолии ҷумҳурӣ пурра аз ваксиназанӣ, яъне ду маротиба гузаштаанд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
