Эмомалӣ Собирзода, вазири мудофиаи Тоҷикистон рӯзи 13-уми ноябр дар шаҳри Исломободи Покистон бо Хоҷа Муҳаммад Осиф, вазири дифои ин кишвар дидору гуфтугӯ кардааст.
Ба иттилои сомонаи Вазорати дифои Тоҷикистон, Эмомалӣ Собирзода дар ин вохӯрӣ гуфтааст, ки “Покистон дар сафи шарикони калидии Тоҷикистон қарор дорад ва ин омил метавонад ҳамкориҳои дуҷонибаро дар самти низомӣ низ рушди бештар бахшад”.
Дар ҳамин ҳол расонаҳои Покистон бо такя ба Вазорати дифои ин кишвар навиштаанд, ки Хоҷа Осиф дар ин дидор омодагии қатъии Покистонро барои таҳкими сулҳ, субот ва ҳамкорӣ дар тамоми минтақа, махсусан бо кишварҳои Осиёи Марказӣ изҳор доштааст.
Ба навиштаи расонаҳои покистонӣ, ҷонибҳо дар баробари масъалаҳои ҳамкории дуҷонибаи дифоӣ, роҳҳои нави густариши ҳамкориҳои низомиро низ баррасӣ кардаанд.
Бояд гуфт, пештар аз ин Эмомалӣ Собирзода бо Шамшод Мирзо, сардори Ситоди кулли нерӯҳои мусаллаҳи Покистон низ мулоқот ва ҳамкориҳои низомиро баррасӣ карда буд.
Ба иттилои сомонаи Вазорати дифои Тоҷикистон, дар ин дидор ҷонибҳо масъалаи “ҳамкориҳои ҳарбӣ ва ҳарбӣ — техникӣ”-ро баррасӣ ва “дар шароити вазъи ноустувори минтақа ва ҷаҳон боз ҳам мустаҳкам кардани дӯстиву бародариро муҳим" арзёбӣ кардаанд.
Баргузории машқҳои муштарак дар ҳарду кишвар, табодули таҷриба ва омӯзиш додани низомиён аз мавзӯъҳои дигари ин суҳбат будааст.
Ба иттилои расонаҳои покистонӣ, Шамшод Мирзо таъкид кардааст, ки ҳарду кишвар манфиатҳои минтақавии муштарак доранд ва ба ҳамкорӣ ва тақвияти низомии худ идома медиҳанд.
