Ҳукумати Тоҷикистон ба корхонаҳои давлатӣ, инчунин ширкату муассисаҳо бо иштироки сармояи давлатӣ, ки қарздоранд, дастур дод, ки саривақт пардохт шудани қарзҳоро таъмин карда, ҳар семоҳа ба Вазорати молия ҳисобот диҳанд.
Дар ин хусус дар қарори ҳукумат доир ба тадбирҳо оид ба иҷрои буҷети давлатӣ барои соли 2026 хабар дода мешавад.
Ин ҷо сари иҷрои уҳдадориҳои қарзӣ оид ба созишномаҳои қарзии дохилӣ, ки дар доираи шартномаҳои давлатии қарзӣ имзо шудаанд, сухан меравад.
Созишномаҳои қарзии дохилӣ шартномаҳое мебошанд, ки дар доираи он давлат қарзҳои ҷалбшударо ба корхонаҳо дода, онҳоро уҳдадор мекунад, ки онро мустақилона баргардонанд.
Дар рӯйхати қарздорон корхонаву муассисаҳои зерин қарор доранд:
– ҶСК «Барқи Тоҷик»;
– КВД «Обу корези Душанбе» («Обу корези Душанбе»);
– ҶСК «Тоҷиктрансгаз»
– КВД «Бонки амонатгузории Ҷумҳурии Тоҷикистон „Амонатбонк“;
– ҶСК «Помир энержи»;
– КВД «Роҳи оҳани Тоҷикистон»;
– ҶСК «Ширкати алюминии тоҷик»;
– КВД бонки саноатӣ ва содиротии Тоҷикистон «Саноатсодиротбонк»;
– ҶСК «НБО Роғун»;
– КВД «Шарқи озод»;
– КВД «Хоҷагии манзилию коммуналӣ»-м Кумитаи манзилию коммуналии назди ҳукумати Тоҷикистон;
– ККВД «Хуҷандобуканал»;
– ККВД «Троллейбус» ш. Душанбе;
– ККВД «Троллейбус» ш. Хуҷанд;
– КВД «Хизматрасонии нақлиёти санитарии шаҳри Хуҷанд»;
– КК «Шуъбаи манзилию коммуналӣ ва хоҷагидорӣ» ш. Турсунзода;
– ККВД «Хоҷагии манзилию коммуналӣ» ш. Бохтар;
– ККВД «Хоҷагии манзилию коммуналӣ» ш. Норак;
– ККВД «Хоҷагии манзилию коммуналӣ» ноҳ. Ёвон;
– ККВД «Хоҷагии манзилию коммуналӣ» ш. Кӯлоб;
– ККВД «Хоҷагии манзилию коммуналӣ» ш. Хоруғ.
Дар санад доир ба фурӯши идомадоштаи амволи собиқ бонкҳои тиҷоратии ҶСК “Агроинвестбонк” ва ҶСК “Тоҷиксодиротбонк” низ сухан меравад, ки дар марҳилаи маҷбурии барҳамдиҳӣ қарор доранд. Дар он дар бораи амволе гуфта мешавад, ки ба ихтиёри моликияти давлатӣ гузаштааст. Дар назар аст маблағҳое, ки аз фурӯши ин амвол ба даст меоянд, ба пардохти қарзи дохилии давлатӣ ва дигар уҳдадориҳои молиявӣ дар назди Вазорати молия равона гардад.
Бино ба маълумоти Вазорати молия, то 1 июли соли 2025 ҳаҷми умумии қарзи давлатии Тоҷикистон 3,6 млрд долларро ташкил додааст, ки ба 21,4% нисбат ба Маҷмӯи маҳсулоти дохилии кишвар баробар аст. Аз ин маблағ 3,1 млрд доллар (88%) ба қарзи беруна ва 422 млн доллар – ба қарзи дохилӣ рост меояд.