Сохтмони биноҳои нотамом, фурӯши як хона ба чанд нафар, шинохти ширкатҳои “қаллоб” ва сохтмони ошёнаҳои иловагӣ ё аз нақша берун, аз ҷумлаи мавзуҳое буд, ки имрӯз, 5-уми феврал дар нишасти матбуотии шаҳрдории Душанбе ба баҳс кашида шуд.
Аз ҷумла, Бахтиёр Шарифӣ, муовини шаҳрдории Душанбе ба чанд нафар фурӯхтани як хона аз сӯи бархе ширкатҳои бинокоронро кирдори “нанговар” хонда, гуфт, ки масъалаи мазкур таҳти назорати худи шаҳрдори Душанбе қарор дорад.
Ӯ зикр кард, ки ба хотири такрор нашудани чунин кирдорҳо минбаъд, дар ҳамаи биноҳои баландошёнаи пойтахт QR-рамзҳо насб мешаванд, то сокинон дар мавриди ширкатҳои бинокор маълумот гиранд.
“Дар ҳақиқат чунин ҳолат дида мешавад ва ин ҳолати нанговар аст, ки баъзе соҳибкорон дидаю дониста як хонаро ба 3-4 кас ба фурӯш мегузоранд. Онҳоро мо соҳибкор ҳам гуфта наметавонем, онҳо қаллоб ва ҷинояткор ҳастанд”, – таъкид кард муовини шаҳрдор.
Бахтиёр Шарифӣ илова кард, ки “марҳала ба марҳала ширкатҳое, ки дар фаъолияташон ба фиребгарӣ даст мезананд, муайян карда, бо онҳо ҳамкорӣ намекунанд".
“Хато аз ҷониби худи шаҳрвандон низ дида мешавад, агар камтар нархи арзонро бинем, кӯшиш мекунем, ҳарчӣ зудтар онро харидорӣ кунем. Он чизе, ки арзон аст, беиллат нест”,-изҳор дошт Шарифӣ.
Баҳсу шикояти сокинони Душанбе бо ширкатҳои бинокор вобаста ба ҳолатҳои қаллобӣ ва як хонаро ба чанд нафар фурӯхтани ширкатҳо зуд-зуд расонаӣ мешавад. Ҳамчунин дар вақти муайяншуда насохтани бино, бо обу барқ таъмин набудани он, насб нагардидани осонбар аз мушкилоти умдаи шаҳрвандон мебошад, ки ҳалли худро наёфтааст.
Чанд рӯз пеш Низом Мирзозода, раиси Кумитаи меъморӣ ва сохтмон низ дар нишасти матбуотии ниҳоди зери роҳбариаш тасдиқ кард, ки баъзе ширкатҳои бинокор воқеан шаҳрвандонро фиреб дода ва шартномаҳои басташударо инкор мекунанд.
Мирзозода дар пайванд ба шикояти сокинон аз кори ширкатҳои бинокор изҳор дошт, ки барои пеш наомадани мушкил ҳангоми хариди хона дар “нотариус” шартнома банданд.
“Ҳолати аз нақша берун бунёд кардани ошёнаҳо дар биноҳои истиқоматӣ ошкор нашудааст”
Ин мавзӯ низ дар нишатси нишасти хабарии шаҳрдорӣ баҳс шуд ва Самӣ Азизиён, сармеъмори пойтахт дар посух ба хабарнигорон гуфт, ки дар 5- соли охир дар пойтахт ягон ҳолати аз нақша берун бунёд кардани ошёнаҳо дар биноҳои истиқоматӣ ошкор нашудааст.
Ӯ гуфт, ки “5 ҳолати аз нақша берун сохтани ошёнаҳо дар миёни ширкатҳои бинокор аз солҳои қаблӣ ба қайд гирифта шудааст”.
Сармеъёмори шаҳр илова кард, ҳоло дар шаҳри Душанбе сохтмони беш аз 1 ҳазору 600 иншоот идома дошта, соли гузашта 327 қарори дахлдор шаҳрдори пойтахт дар бораи сохтмони иншооти баландошёна ба имзо расидааст.
Тибқи маълумоти Кумитаи меъморӣ ва сохтмон соли 2025-ум дар кори 1 ҳазору 288 ширкати бинокор 7 ҳазору 331 камбудӣ ошкор шуда, онҳо дар умум 547 ҳазору 350 сомонӣ ҷарима шудаанд. Аз ҷумла соли гузашта 72 ширкати бинокор бе хулосаи ташхиси давлатӣ, сохтмони иншоотро оғоз кардаанд.
Бояд гуфт, ки ҳудуди 4 сол пеш, Сарраёсати меъморӣ ва шаҳрсозии Душанбе талабот ба иҷрои корҳои сохтмонро сангинтар кард, то ки ба интихоби ширкати арзанда, ҳимоя аз ҳиссагузорону моликон ва пешгирии муҳлати тӯлонӣ давом додани корҳои сохтмон мусоидат кунад. Аммо тавре мушоҳидаҳо нишон медиҳад, ин иқдом низ мушкилиҳо дар ин самтро пурра ҳал карда натавонист.
