Русия дар бораи рафти таштишоти парвандаи Қобилҷон Алиев, кӯдаки 10-солаи тоҷик, ки моҳи декабри соли 2025 дар Русия кушта шуд, ба мақомоти Тоҷикистон маълумоти расмӣ пешниҳод карда, ҷониби Тоҷикистонро итминон додааст, ки масъала “зери назорати махсус қарор дорад”.
Дар ин бора Сироҷиддин Муҳриддин, вазири корҳои хориҷии Тоҷикистон имрӯз дар нишасти матбуотӣ хабар дод.
“Бино ба иттилои Вазорати корҳои дохилии Русия, аз ҷониби Кумитаи таштишотии ин кишвар дар Маскав парвандаи ҷиноӣ боз шуда, ҷинояткор дастгир ва бо ҷурми содир кардани одамкушӣ ва суиқасд барои одамкушӣ дар ҳолати вазнинкунанда айбдор эълон шуд ва сипас аз ҷониби суд нисбат ба ӯ чораи пешгирӣ дар намуди ҳабс интихоб гардид”, – шарҳ дод вазир.
ИЗОБРАЖЕНИЕ Сироҷиддин Муҳриддин
Ба гуфтаи ӯ, ҷониби Русия гуфтааст, “дар бораи натиҷаҳои минбаъдаи тафтишот иловатан огоҳ хоҳад кард”. Аммо вазири тоҷик дар бораи вакили дифоъ доштан ва ё надоштани волидони Қобилҷон иттилоъ надод. Ҳамчунин, маълум нест, ки мурофиаи додгоҳии ӯ кай оғоз мешавад.
Сироҷиддин Муҳриддин фоҷиаеро, ки бо фарзанди даҳсолаи тоҷик рух дод, “дарди тамоми мардум” номид.
“Аз рӯзи нахустин ин масъала зери назорати махсуси раисҷумҳури кишвар қарор дошта, Вазорати корҳои хориҷӣ низ онро зери назорати худ гирифтааст”, – илова кард ӯ.
Ҳамчунин, вазири корҳои хориҷӣ дар робита ба ҳифзи кӯдакони муҳоҷирон ва дигар шаҳрвандони тоҷик дар Русия гуфт, вазорат ҳамеша бо ҷониби Русия дар тамос аст ва байни сохторҳои Тоҷикистону Русия “корҳои зиёд бурда истодааст”.
Ба қавли ӯ, ҳар як ҳодисае, ки дар ин кишвар бо шаҳрвандони Тоҷикистон рух медиҳад, зери назорат гирифта мешавад ва тамоми сохторҳои дипломатии Вазорати корҳои хориҷӣ ва намояндагони дигар вазорату идораҳои кишвар дар Русия, “барои ҳифзи ҳуқуқи ҳар як шаҳрванди Тоҷикистон чораҳои зарурӣ ба роҳ мондааст.
“Лекин шумо медонед, ки Русия ниҳоят кишвари бузург аст ва дар ҳар ноҳияву деҳааш шаҳрвандони Тоҷикистон ҳастанд. Саривақт ба ҳамаи онҳо кумак расонидан ба намояндагони сохторҳои мо каме мушкилӣ ҳам мекунад. Лекин ба ҳамин нигоҳ накарда, ҳамдигарфаҳмӣ бо ҷониби Русия вуҷуд дорад”, – гуфт ӯ.
Ба қавли вазир, бо вуҷуди он ки баъзан ҳодисаҳои нохуш ҳам рух медиҳанд, “дар сатҳи ҳукуматӣ ҳамдигарфаҳмӣ вуҷуд дошта, ҳамкориҳо давом хоҳанд кард”.
Ёдовар мешавем, ки Қобилҷон Алиев рӯзи 16-уми декабр дар мактабе дар вилояти Маскав аз сӯйи навраси 15-сола ва шаҳрванди Русия бо корд ва бар пояи нафрати миллӣ кушта шуд. Ҷасади навраси тоҷикро 18-уми декабри 2025 ба Тоҷикистон оварда, дар зодгоҳаш, ноҳияи Шаҳринав ба хок супурданд.
Ба куштори Қобилҷон Алиев мақомоти тоҷик, аз ҷумла Вазорати корҳои хориҷии Тоҷикистон зуд вокуниш кард ва сафири Русия дар Душанберо даъват карда, нота супорид. Коршиносон омили аслии ин фоҷеаро маҳз натиҷаи ташаккули фазои муҳоҷирситезӣ ва беҷазоӣ барои нажодпарастӣ дар Русия маънидод карданд.
