Ба ҷони генерал-лейтенант Владимир Алексеев, муовини аввали сардори Сарраёсати Ситоди кулли нирӯҳои мусаллаҳи Русия, ки ҳамчун бо бахши истихбороти ҳарбии ин кишвар маъруф аст, сӯиқасд сурат гирифтааст. Ӯ ҷароҳат бардошта, дар бемористон дар ҳолати вазнин бистарӣ аст.
Дар ин бора расонаҳо бо такя ба иттилои Кумитаи тафтишотии Русия хабар додаанд. Аз ҷумла, ВВС навиштааст, “шахси номаълум дар зинапояи даромадгоҳи манзили истиқоматӣ дар лаҳзаи берун шудани генерал аз хонааш а пушташ ба Алексеев чанд тир холӣ карда, аз ҷои ҳодиса фирор кардааст”. Ба эҳтимоли мақомоти қудратӣ, сӯиқасдкунанда зан аст ва ҳодиса рӯзи 6-уми феврал сурат гирифтааст.
“Ҷабрдида дар яке аз беморхонаҳои шаҳр бистарӣ карда шуд”, – гуфтааст сухангӯи расмии ин ниҳод Светлана Петренко.
Дар бораи вазъи саломатии Алексеев маълумоти расмӣ вуҷуд надорад. Телеграм – канали “Baza”, ки ба мақомоти қудратии Русия наздки аст, хабар медиҳад, ки “вазъи генерал вазнин аст”.
Дар ҳаимн ҳол, нашрияи “Коммерсант” бо такя ба манбаъҳояш навиштааст, ки ҳамлагар дасту пои генералро захмӣ карда, як тир ба узви муҳими бадани генерал ҳам расидааст.
Дмитрий Песков, сухангӯи президенти Русия, нисфирӯзии имрӯз эълон кард, ки Владимир Путин аз сӯиқасд ба Алексеев огоҳ карда шудааст.
Дар робита ба ин ҳамла бо иттиҳоми сӯиқасд ба куштор ва қочоқи ғайриқонунии силоҳи оташфишон парвандаи ҷиноӣ боз шудааст.
Дар расонаҳо Владимир Алексеев яке аз чеҳраҳои матраҳи низоми қудратии Русия муаррифӣ мешавад ва соли 2017 ба ӯ унвони Қаҳрамони Русия дода шудааст.
Ба иттилои расонаҳо, Алексеев яке аз ҷалбкунандагони “ихтиёриён”-и артиши Русия дар ҷанги Украина мебошад ва тобистони соли 2023 ӯ дар музокирот бо асосгузори “Вагнер” Евгений Пригожин дар давраи шӯриш ширкат варзидааст.
Ин аввалин кӯшиши сӯиқасд ба як афсари баландпояи низомии Русия аз оғози ҷанги Русия алайҳи Украина нест. Моҳи декабри соли 2025 дар Маскав таркиши мошин рух дод, ки дар натиҷа генерал Фанил Сарваров, сардори Шӯъбаи омодагии амалиётии Ситоди кулли Русия, ҷароҳатҳои вазнин бардошта, ба ҳалокат расид.
Дар моҳи апрели соли гузашта генерал-лейтенант Ярослав Москалик ва дар моҳи декабри соли 2024 генерал-лейтенант Игор Кириллов ва ёвари ӯ Иля Поликарпов тарконида шуданд. Дар пайванд ба қатли Криллов, як шаҳрванди Ӯзбекистон ба ҳабси абад ва се тани дигар ба муҳлати 25, 22 ва 18 сол равонаи зиндон шудаанд.
