Қарзи давлатии Тоҷикистон то 1 январи соли равон 3,5 млрд долларро ташкил медиҳад, ки ба 19,2% нисбат ба Маҷмӯи маҳсулоти дохилӣ (ММД)-и ҷумҳурӣ баробар аст. Дар ин бора зимни нишасти матбуоти имрӯза, 13 феврал дар Душанбе вазири молияи Тоҷикистон Файзиддин Қаҳҳорзода хабар дод.
Аз ҷумла, ба гуфтаи ӯ, 3 млрд доллар (87% аз ҳаҷми умумии қарзи давлатӣ) ба қарзи хориҷӣ ва 500 млн доллар (13%) – ба қарзи дохилӣ рост меояд.
Ёдрас мекунем, ки то 1 январи соли 2025 қарзи давлатии Тоҷикистон 3,6 млрд доллар ва таносубаш ба ММД 25,2%-ро ташкил дода буд. Аз ҷумла, 3,2 млрд доллар (89%) ба қарзи беруна ва 400 млн доллар (11%) – ба қарзи дохилӣ рост меомад.
Вазир зикр кард, ки соли гузашта дар ҳамкорӣ бо дигар вазорату идораҳои ҷумҳурӣ аз ҷониби Вазорати молия ба маблағи умумии 619 млн доллар 31 созишнома барои татбиқи 25 лоиҳаи давлатии сармоягузорӣ ба имзо расидааст.
ИЗОБРАЖЕНИЕ Файзиддин Қаҳҳорзода
Ӯ таъкид дошт, ки соли 2025 барои хидматрасонӣ ҷиҳати пардохти қарзи давлатӣ 504,6 млн доллар равона шудааст, ки 416,3 млн доллараш баҳри пардохти қарзи асосӣ ва 88,3 млн доллар – пардохти фоизҳо масраф шудааст.
“Таъмини иҷрои уҳдадориҳои давлатии молиявӣ дар доираи нақшаи тасдиқгардида ба роҳ монда шудааст”, – иброз дошт вазир.
Зимнан зикр шуд, ки саркашӣ аз иҷрои нақшаи пардохти қарзҳо дар назди созмонҳои байнулмилалии молиявӣ ва кишварҳои ҷудогона вуҷуд надорад.
Қарздиҳандаи асосии кишвар Бонки содирот ва воридоти Чин боқӣ мемонад, ки ҳаҷми қарз аз он ба гуфтаи вазир, давра ба давра қариб то 700 млн доллар коҳиш ёфтааст.
Ҳамчунин ҷумҳурӣ ба маблағҳои нисбатан назаррас аз Бонки ҷаҳонӣ (ҳудуди 380 млн доллар), Бонки осиёии рушд (зиёда аз 250 млн доллар), Бонки исломии рушд (беш аз 250 млн доллар), Хазинаи байнулмилалии асъор (195 млн доллар) ва Бонки аврупоии таҷдиду рушд (165 млн доллар) қарздор аст.