Мақомоти Тоҷикистон муҳлати маъракаи қонунигардонии воситаҳои пулии шаҳрвандони ҷумҳуриро боз як сол – то 5 январи соли 2027 дароз карданд.
Иқдоми мазкур дар доираи қонуни Тоҷикистон “Дар бораи авф бинобар қонунигардонии дороиҳо ва маблағҳои шаҳрвандони ҶТ”, ки аз 5 июли соли 2021 амал мекунад, сурат мегирад. Аз он вақт муҳлати амали қонуни мазкур аллакай чор маротиба тамдид шуд.
“Қисмати вобаста ба маблағро боз як сол дароз кардем. Қонунигардонии дигар дороиҳо, масалан молу мулк 5 январ ба охир расид”, – хабар дод ба “Азия-Плюс” раиси Бонки миллии Тоҷикистон (БМТ) Фирдавс Толибзода.
Ба гуфтаи ӯ, аз замони ҳукми қонунӣ гирифтани қонун маблағи ҳудуди 11,7 млрд сомонӣ (беш аз 1,2 млрд доллар бо қурби расмии ҳозира) қонунӣ гардонида шуд.
Соли 2025 маблағи қариб 4 млрд сомонӣ қонунӣ гардонида шуд, ки 34,2% аз маблағи умумиро ташкил медиҳад.
Раиси БМТ таъкид дошт, ки ҳудуди 42%-и маблағҳои қонунигардонидашуда аз ҷониби субъектҳо ба сармоягузорӣ равона гардида, тақрибан 29%-аш ба суратҳисобҳои пасандоз гузошта шуданд ва қисми боқимондаи он барои мубодилаи асъор истифода шуд, яъне асъори хориҷӣ ба асъори миллӣ иваз карда шуд.
Пас аз ворид намудани тағйирот дар қонун ихтиёрӣ эълон намудани воситаҳои пулӣ пешбинӣ шудааст. Қонунигардонӣ дорандагони чун ин дороиҳоро ба таври худкор аз ҷавобгарии маъмиурӣ ё ҷиноятӣ озод карда, инчунин андоз, фоиз ва ҷаримаҳо нисбати онҳоро аз эътибор соқит мекунад.
Шаҳрвандони Тоҷикистон маблағҳои худро, ки дар гардиши “паси соя”-и иқтисодӣ дар дохил ё хориҷи кишвар қарор доранд, метавонанд бо асъори миллӣ ё хориҷӣ дар шакли нақдӣ ва ғайринақдӣ қонунӣ гардонанд.
Дар маблағи қонунигардонӣ танҳо он маблағҳое зикр мешаванд, ки дар эъломияҳои расмӣ зикр нашудаанд ё аз гардиши қонунии иқтисодӣ бароварда шудаанд.
Маълумот дар бораи дороиҳое, ки қонунӣ гардонида мешаванд ва моликони онҳо танҳо бо қарори суд метавонад ифшо шавад.
Қабули қонунро мақомот ба ҷалби сармояи иловагӣ дар низоми молиявӣ ва бонкӣ ва афзоиши маблағгузорӣ ба соҳаҳои гуногуни иқтисод рабт медиҳанд.
Ғайр аз ин қонунигардонии дороӣ ва маблағҳо ба бунёди корхонаҳои нав, афзоиши сармояи оинномавии ширкатҳои амалкунанда, фароҳам сохтани ҷойҳои нави корӣ, афзоиши даромад аз андоз ва рушди бозори коғазҳои қиматнок мусоидат мекунад.