Исматулло Абдуллозода, роҳбари пешини Фурудгоҳи байналмилалии Душанбе, ки 94,3 миллион сомониро ба буҷети давлат барқарор кардааст, вале 922,4 миллион сомонии дигари тасарруфкардаи ӯ то ҳол барқарор нашудааст. Дар ин бора Сулаймон Султонзода, роҳбари Оҷонсии зиддифасоди Тоҷикистон имрӯз, 13-уми феврал, зимни нишасти хабарӣ иттилоъ дода, ҳамзамон, далели дар озодӣ будани Абдуллозодаро гуфт.
Ба гуфтаи Султонзода, дар доираи ин тасарруфкорӣ ба миқдори махсусан калон нисбат ба 21 кас парвандаи ҷиноятӣ боз шуда, тафтишоти 20 парванда пурра ба анҷом расида, ба додгоҳ ирсол шудааст.
Дирӯз раиси Додгоҳи олӣ дар шарҳи ин қазия гуфт, Додгоҳи шаҳри Душанбе парвандаи 14 муттаҳамро баррасӣ кардааст, аммо парвандаи худи Исматулло Абдуллозода ба додгоҳ ворид нашудааст.
Роҳбари Агентии зиддифасод суханҳои раиси Додгоҳи олӣ дар бораи ирсол нашудани парвандаи Исматулло Абдуллозода ба додгоҳро тасдиқ карда, гуфт, “тафтишоти парвандаи Абдуллозода ҷараён дорад ва он ба наздикӣ ба суд ирсол мешавад”.
Сулаймон Султонзода иттилоъ дод, аз маблағи тасарруфшудае, ки дар доираи парвандаи Исматулло Абдуллозода ва ҳамроҳонаш тасарруф шуда буданд, 322,8 миллион сомонӣ ба буҷети давлат баргардонида шудааст.
Танҳо роҳбари пешини Фурудгоҳи байналмилалии Душанбе, ба қавли Султонзода, 94 миллиону 300 ҳазор сомонии тасарруфкардаашро барқарор кардааст. Аммо 922 миллиону 400 ҳазор сомонии дигари тасарруфкардаи Абдуллозода то кунун барқарор нашуда мондааст.
Чаро Исматулло Абдуллозода дар озодӣ аст?
Сулаймон Султонзода дар озодӣ қарор доштани роҳбари пешини Фурудгоҳи байналмилалии Душанберо тасдиқ карда, сабаби онро шарҳ дод. Ӯ гуфт, ки Исматулло Абдуллозода тибқи талаботи Кодекси мурофиавии ҷиноятӣ ва Кодекси ҷиноятӣ бо мақсади барқарор кардани маблағи тасарруфкардааш озод шудааст.
Агентии зиддифасод аз Абдуллозода забонхат гирифтааст, ки ҳақ надорад аз маҳалли истиқомат берун равад.
“Бо мақсади барқарор кардани маблағи зарар. Барои он ки аксарияти амволе, ки мақомоти тафтишотӣ пешниҳод карданду ошкор кардему ба ҳабс гузоштем, аксарият дар номи худаш, дар номи хешу табораш ба расмият дароварда шудааст. Ҳангоми фурӯхтан фарзандонаш ҳамин имкониятро пайдо накарданд. Мо лозим шуморидем, чораи пешгириашро иваз кардем. Аз 94,3 миллион сомонӣ қисмати зиёдаш баъди иваз кардани чораи пешгирӣ барқарор шудааст”, – гуфт Сулаймон Султонзода.
Бояд гуфт, қаблан гуфта мешуд, ки дар доираи ин парванда дар маҷмуъ, нисбати 22 нафар парвандаи ҷиноятӣ боз шудаааст.
Инчунин, қаблан ин Оҷонсӣ ба “Азия-Плюс” гуфта буд, худи Абдуллозода ба тасарруфи 961 миллион сомонӣ ё муодили 100 миллион доллар гумонбар аст. Аммо имрӯз Султонзода ду маблағеро гуфт, ки ҷамъи он 1 миллиарду 16 миллиону 700 ҳазор сомонӣ мешавад.
Бояд гуфт, ки нисбати гумонбарони ин парванда бо моддаи 245 қисми 4 банди б (азонихудкунӣ ё исрофкорӣ ба миқдори махсусан калон) ва 340 қисми 2 бандҳои а, б (сохтакории такрории ҳуҷҷатҳотакрорӣ бо маслиҳати пешакӣ аз ҷониби гурӯҳи одамон) парвандаи ҷиноятӣ оғоз шудааст.
Ёдрас мешавем, ки моҳи майи соли гузашта Исматулло Абдуллозода ҳамроҳи муовинонаш бо сабаби “ошкор шудани камбудиҳои ҷиддӣ дар фаъолияташон зимни санҷиши молиявӣ” аз вазифа озод шуданд.
Дар хусуси ин парванда бештар дар ин пайванд мутолиа кунед.
