Ҳайати Тоҷикистон таҳти раҳбарии Шералӣ Кабир, вазири саноат ва технологияҳои нави кишвар дар "Нишасти ҷаҳонӣ дар робита ба таъсири ҳуши маснӯӣ 2026" (India AI Impact Summit 2026), ки аз 16 то 20-уми феврал дар шаҳри Деҳлии нави Ҳиндустон мегузарад, иштирок дорад.
Тавре ки Вазорати саноати Тоҷикистон хабар медиҳад, дар доираи нишаст Шералӣ Кабир бо Сэм Алтман, мудири кулли "OpenAI" дидору гуфтушунид кардааст. Дар ҷараёни мулоқот, имконоти истифодаи дастовардҳои ширкат барои тағйири рақамии саноати Тоҷикистон ва роҳандозии лоиҳаҳои санҷишӣ дар соҳаи ҳуши маснӯӣ (зеҳни сунъӣ) баррасӣ шудааст.
Дар доираи чорабинӣ, Шералӣ Кабир, ҳамчунин, бо намояндагони сохторҳои давлатии Ҳиндустон, созмонҳои байналмилалӣ ва роҳбарони ширкатҳо дар соҳаи ҳуши маснӯӣ дидору гуфтушунидҳо анҷом дода, дурнамои татбиқи лоиҳаҳои муштарак ва ҷалби сармоягузориро мавриди баррасӣ қарор додааст.
Аз ҷумла, Шералӣ Кабир бо Ашвини Вайшнаму, вазири роҳи оҳан, электроника ва технологияҳои иттилоотии Ҳиндустон дидор карда, “сатҳи баланди иштироки кишвар дар муколамаи байналмилалиро таъкид кардааст".
Дар ин нишаст, ҳайати Тоҷикистон афзалияти Тоҷикистонро дар соҳаи саноат ва ҷорисозии ҳуши маснӯӣ муаррифӣ кардааст. Ба иттилои манбаъ, аз ҷумла, ба масоили таъмиру таҷдиди раванди истеҳсолот, рушди иқтисоди рақамӣ, инчунин омодасозии кадрҳо барои саноати оянда таваҷҷуҳи хосса зоҳир шудааст.
Майдони байналмилалӣ барои баррасии рушди ҳуши маснӯӣ
Нишасти мазкур, ки таҳти роҳбарии нахуствазири Ҳиндустон мегузарад, чорумин вохӯрӣ дар силсилаи ҳамоиши глобалӣ дар бораи ҳуши маснӯӣ астд, ки аз соли 2023 гузаронида мешавад. Қаблан чорабиниҳои ба ин монанд дар Фаронса, Кореяи Ҷанубӣ ва Британияи Кабир доир гардида буданд. Дар ин чорабинӣ намояндагони зиёда аз 100 кишвар ширкат меварзанд.
Аз ҷумла, Антониу Гутерриш, дабири кулли СММ Дзимни суханронии худ дар ин ҳамоиш даъват кард, ки дастрасии васеъ ва боадолат ба технологияҳои ҳуши маснӯӣ таъмин шавад ва ояндаи ин соҳа набояд аз ҷониби доираи маҳдуди бозигарони хусусӣ муайян карда шавад.
Дар чаҳорчӯби кори нишаст сарони кишварҳои ҷаҳон доир ба масоили танзими ҳуши маснӯӣ, таъсири технологияҳо ба бозори кор ва таъмини амнияти кӯдакон дар муҳити рақамӣ изҳори назар карданд.
