Вазорати умури хориҷии Узбекистон роҷеъ ба хабари оташкушоӣ дар марзи ин кишвар бо Афғонистон ва ҳалокати як марзбони узбек, ки 4 май паҳн шуд, изҳорот нашр кард.
"Ин хабари паҳншуда ҳақиқат надорад. Вазъ дар марзҳои кишвар ором боқӣ мемонад ва муҳофизати марзҳои ҷанубии кишвар тибқи маъмулӣ идома дорад", – омадааст дар изҳорот.
Намояндаи расмии ҳукумати муваққати гуруҳи Толибон дар Афғонистон Забеҳуллоҳ Муҷоҳид низ хабари тирпаронӣ дар марз бо Узбекистонро рад карда, онро дуруғ номидааст.
Ин дар ҳолест, ки шохаи "Хуросон"-и гурӯҳи ДОИШ рӯзи 18-уми апрел иддао карда буд, ки шаҳри Термизи Ӯзбекистонро мавриди тирборон қарор додааст.
Амо баъадн ин иддаоро ҳам ҳукумати Ӯзбекистон ва ҳам гуруҳи "Толибон" рад карданд.
Абдулқаҳори Балхӣ, сухангӯйи Вазорати корҳои хориҷии Толибон, бо интишори твите партоб шудани ракет аз хоки Афғонистон ба шаҳри Термизи Ӯзбакистонро овоза хонд ва рад кард.
Ҳукумати Узбекистон ҳам он замон, иддаои гуруҳи тундрави “Давлати исломӣ”-ро дар мавриди ҳамлаи мушакӣ аз хоки Афғонистон ба ҳуҳуди кишвараш рад кард.
Сухангӯи президенти Узбекистон, Шерзод Асадов, рӯзи 19-уми апрел хабарҳоро дар бораи он ки гуё марзбонони ин кишвар аз хоки Афғонистон мушакборон шудаанд, беасос хонд.
Ӯ дар Телеграм навишта буд: “Бино ба иттилои Вазорати дифоъ ва Хадамоти марзбонии Узбекистон, дар марзи кишвар бо Афғонистон амалиёти ҷангие сурат намегирад ва вазъ ором мебошад.”
Сухангӯи раисҷумҳури Узбекистон аз сокинони он кишвар хостааст, “ба хабару овозаҳои беасос” бовар накунанд.
Дар Вазорати дифои Узбекистон низ гуфтаанд, хабари мушакборон шудани марзбонон дар Тирмиз “ҳақиқат надорад”.
