Дар Тоҷикистон китобе бо номи "Ҷавонмарди асил" дар бораи Нусратулло Тӯрахонов мулаққаб ба Исматча, яке аз чеҳраҳои маъруфи олами ҷиноии солҳои 80-ум ва оғози ҷанги шаҳрвандии Тоҷикистон нашр шудааст.

Таҳиягари ин китоб таърихшинос Ҷалолиддини Сафарзод мегӯяд, ки ин китоб дар бораи қаҳрамониҳои Исматулло Тӯрахонов қисса мекунад ва ба ифтихори 30-солагии Истиқлоли Тоҷикистон нашр шудааст. 

Мураттиби китоб ба "Азия-Плюс" гуфт, ки ӯ дар давоми 7 сол, дар бораи қаҳрамониҳои Нусратулло Тӯрахонов мақолаҳо ва тамоми маводи чопиро аз матбуоти даврӣ ҷамъоварӣ карда, ин китобро бо маблағи шахсияш чоп кардааст.

Ҷалолиддин Сафарзод мегӯяд, пас аз 29 соли марги Исматча дар ин китоб аз шуҷоату ҷонбозии ӯ барои мардуми тоҷик гуфта шудааст.

"Исматулло нафаре ҳаст, ки амалкардҳояш барои пешгирӣ аз ҷангҷӯён нақши калидӣ мебозид. Ман ин китобро барои сулҳу осоиши кишвар ва ваҳдати миллӣ дар Тоҷикистон азиз ба нашр расонидам. Мақсад аз нашри ин китоб дар он аст, ки бигзор мардум дигар ба васваса ва доми ҷангҷуён дода навашанд".

Таҳиягари китоб иддао дорад, ки "маҳз бо талоши ҳамин гуна ҷавонмардони асили тоҷик мо ба ҳамини рӯзҳои нек расидем".  

Ин китоб дар ҳоли ҳозир ҳамагӣ бо теъдоди 100 нусха чоп шудааст.   

Исматча (Тӯрахонов Нусратулло Саидович) 22.09.1961 дар кӯчаи Айнии ноҳияи Совет (ҳоло н.Темурмалик) ба таваллуд шудаву мактабро дар ин ноҳия то синфи 8 хондааст. Баъдан ба Техникуми тарбияи ҷисмонии Душанбе дохил мешавад, вале дар як ҷанҷоли калон, ки гуфта мешавад миёни ҷавонони помириву кӯлобӣ сурат гирфта буд, соли 1983 ӯро маҳкум мекунанду ба зиндони Красноярск мепартоянд, ки баҳори соли 1992 аз зиндон раҳо шуд. 

Нусратулло Тӯрахонов дар поёни соли 1992 дар синни ҳамагӣ 31-солагиаш кушта шуд. Исматча қабл аз марг дар як маҳфил хотираҳояш дар бораи ҳодисаҳои соли 1992-ро қисса кардааст. Видеои ин суҳбат, ки 42 дақиқа аст, се сол пеш дар интернет пайдо ва дастраси расонаҳо шуд. Дар ин видео ӯ дар бораи бархе аз гуфтугузорҳои оғози ҷанги шаҳрвандӣ суҳбат мекунад ва аз сиру асрорҳои то ин вақт номаълум парда мебардорад.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

 бо мо бимонед.Google Новости ва OK, Яндекс.Дзен, Viber, Instagram, Facebook, TelegramДар