Дар зарфи 10 моҳи соли ҷорӣ корхонаҳои коркарди пӯсти ҷумҳурӣ беш аз 820 ҳазор адад пӯсти чорвои калони шохдор ва хурдро коркард карданд.
Тавре аз Вазорати энергетика ва саноати ҷумҳурӣ хабар доданд, ин нишондиҳанда дар қиёс бо ҳамин давраи соли гузашта 4,6 маротиба бештар аст.
«Моҳи сентябри соли равон ду корхонаи нави коркарди пӯст бо иқтидори умумии коркарди 450 ҳазор адад пӯст дар як сол мавриди истифода қарор гирифт», – гуфтанд дар Вазорати мазкур.
Бино ба иттилои манбаъ, соли равон дар корхонаҳои ватанӣ 327,3 тонна пашм ба маблағи умумии 1, 4 млн. сомонӣ коркард шудааст.
Зикр гардид, ки ба афзоиши коркарди пӯсту пашм қарори ҳукумати кишвар дар бораи муваққатан манъ намудани содироти ин навъи ашёи хом мусоидат кард.
