Мувофиқи нақшаи ҳукумати ҷумҳурӣ, ахири моҳи сентябр бо иштироки сарвари давлат Эмомалӣ Раҳмон маросими расмии мавриди баҳрабардорӣ қарор гирифтани нақби «Шаҳристон» баргузор мешавад.
Дар ин робита зимни мусоҳиба бо хабарнигори ОИ «Азия-Плюс» муовини аввали раиси вилояти Суғд Ҷумъабой Сангинов иброз дошт, ки ахири ҳафтаи гузашта нахуствазири ҷумҳурӣ Оқил Оқилов ва вазири нақлиёт Низом Ҳакимов аз майдони сохтмони нақб боздид намуданд. «Дар ҷаласаи ситоди сохтмони иншоот бинокорон муваззаф шуданд, ки дар муҳлати пешбинишуда корҳои сохтмониро ба анҷом расонанд», – гуфт ӯ.
«Чорабиниҳои асосӣ дар мавриди ба истифода додани нақби «Шаҳристон» дар шаҳри Истаравшан доир мегарданд, – гуфт ӯ. – Дар Истаравшан сохтмони варзишгоҳ бо 20 ҳазор ҷойи нишаст дар арафаи анҷомёбӣ буда, ғайр аз ин, боз мавриди истифода қарор гирифтани як қатор иншооти иҷтимоиву маишӣ ва корхонаҳои саноатӣ дар назар аст».
Муовини раиси вилояти Суғд ҳамчунин иттилоъ дод, ки дар минтақаи шимоли ҷумҳурӣ ба ифтихори таҷлили ҷашни навбатии солгарди истиқлоли ҷумҳурӣ беш аз 200 иншооти таъиноти саноативу иҷтимоӣ ва маишӣ ба истифода дода мешаванд.
Нақби «Шаҳристон» дар километи 180-уми роҳи мошингарди Душанбе-Хуҷанд, миёни ноҳияҳои Айниву Шаҳристон воқеъ буда, дарозии он 5 ҳазору 253 метрро ташкил медиҳад. Сохтмони нақби мазкур расман санаи 2-юми августи соли 2006 оғоз гардид.
Арзиши сохтмони нақб тибқи лоиҳа 175 млн. сомонӣ (51,7 млн. $)-ро ташкил медиҳад. Сохтмони нақби мазкур яке аз қисматҳои лоиҳаи азнавсозии роҳи мошингарди Душанбе-Чаноқ маҳсуб меёбад. Паймонкори генералии сохтмони нақб ширкати чиноии China Road аст.
