Вазорати молияи Тоҷикистон ба гуфтугузорҳо дар бораи ворид нашудани маблағ ба фонди зарардидагони муноқишаи Ворух вокуниш нишон дод ва гуфт, ки манзури муовини вазири молия Ҷамшед Каримзода дар мавриди ворид нашудани маблағ ба фонди мазкур ташкилотҳои хориҷист.
Дар вокунише, ки як рӯз пас дар сомонаи расмии вазорат нашр шуд, гуфта мешавад, ки аз ҷониби сокинони кишвар ба фонди зарардидагон Ворух беш аз 200 ҳазор сомонӣ кӯмак ворид шудааст.
– Манзури муовини якуми Вазири молияи Тоҷикистон Каримзода Ҷамшед ба саволи рӯзноманигор дар хусуси воридоти маблағҳо ба суратҳисоб барои расонидани кумак ба осебдидагони низоъи мусаллаҳона дар марзи Тоҷикистону Қирғизистон, ки дар Сарраёсати хазинадории марказии Вазорати молия кушода шудааст, ин буд, ки аз ҷониби ташкилоту созмонҳои байналмилалии молиявӣ то имрӯз ба ин суратҳисоб маблағ ворид нагардидааст, – омадааст дар вокуниши расмӣ.
Манбаъ менависад, ки аз ҷониби шаҳрвандони кишвар то имрӯз ба ин суратҳисоб 206 526,67 (дусаду шашҳазору панҷсаду бисту шаш сомонию шасту ҳафт дирам) ворид гардидааст, ки он аз рӯи таъинот истифода карда мешавад.
Дирӯз, дар нишасти матбуотии Вазорати молия муовини аввали ин ниҳод Ҷамшед Каримзода ба суоли рӯзноманигорон дар мавриди чӣ қадар ворид шудани маблағ ба суратҳисоби зарардидагони муноқишаи марзӣ посух дод, ки ба фонди зарардидагони муноқишаи Ворух маблағ ворид нашудааст.
Ба дунболи ин гуфтаи муовини вазир, Раҷаби Мирзо, рӯзноманигор ва масъули гуруҳи фейсбукии "Ахбор барои афкор" расид ё чекеро нашр кард ва гуфт, аз ҳисоби хайрияи мардум ба суратҳисоби бозкардаи Вазорати молия 10 ҳазор сомонӣ гузарондааст. Раҷаби Мирзо пурсид, ки 10 ҳазор сомонӣ куҷо шуд, вақте муовини аввали вазир мегӯяд, ба суратҳисоб маблағ ворид нашудааст.
ИЗОБРАЖЕНИЕ Расиди маблағе, ки Раҷаби Мирзо ба суратҳисоб пул гузаронидааст.
Баъди ин изҳори назари Раҷаби Мирзо, корбарони шабакаҳои иҷтимоӣ вокунишҳои сахте ба суханони вазири молия ва муовини якумаш дар робита ба кам ё умуман ворид нашудани маблағ ба суратҳисоби мазкур, карданд.
Моҳи майи соли ҷорӣ барои кумак ба сокинони зарардидаи муноқишаи марзӣ ҷомеаи шаҳрвандӣ мустақилона суратҳисоби кумак боз кард, аммо бо гузашти чанд рӯз мақомот ҷамъоварии маблағро манъ карданд ва бо кушодани суратҳисоби нав дар Вазорати молия аз аҳолӣ талаб краданд, ки маблағҳои худро ба ин суратҳисоби расмӣ гузаронанд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
