Дар вилояти Суғд як зан тифли навзоди худро ба ивази 32 ҳазор рубли русӣ фурӯхт. Сокини 21-солаи шаҳри Ваҳдат З.Ф. санаи 12-уми август дар таваллудхонаи шаҳри Хуҷанд кӯдак ба дунё оварда, онро ба дасти сокини шаҳри Хуҷанд месупорад.
Тавре ба ОИ «Азия-Плюс» аз Раёсати ВКД ҶТ дар вилояти Суғд хабар доданд, ин далел рӯзи чоршанбе, 15-уми август, зимни баргузории амалиёти фаврӣ-ҷустуҷӯйи ошкор карда шудааст.
«Модари ҷавон пас аз маслиҳати пешакӣ бо сокини 57-солаи ҷамоати Хистеварзи ноҳияи Бобоҷон Ғафуров З.М., тифли навзоди худро ба маблағи 32 ҳазор рубли русӣ ба ӯ фурӯхтанӣ будааст», гуфтанд дар Раёсати ВКД.
Зикр гардид, ки аз рӯйи ин далел нисбат ба занони зикршуда мутобиқи моддаи 167, қисми 2-и КҶ ҶТ (хариду фурӯши ноболиғон) парвандаи ҷиноӣ боз шуда, тафтишот идома дорад.
