Роҳбандии якмоҳа дар Душанбе барои тамрини паради низомии рӯзи Истиқлол

Шаҳрдории Душанбе мегӯяд, ҳаракати нақлиёт дар баъзе кӯчаҳои марказии шаҳр аз 10 август то 7 сентябри соли равон қатъ мегардад.

Манбаъ, сабаби инро ба гузаронидани тамринҳои сафороӣ ва Паради ҳарбӣ бахшида ба ҷашни 30-солагии Истиқлолияти давлатии Ҷумҳурии Тоҷикистон ва иҷрои қарори Раиси шаҳри Душанбе аз 9 авугсти соли 2021, №470 рабт медиҳад.

Гуфта мешавад, ки ҳаракати ҳамагуна воситаҳои нақлиёти автомобилӣ дар кӯчаи Ҳофизи Шерозӣ (аз буриши кӯчаи Карамов то буриши кӯчаи Саъди Шерозӣ) аз 10 то 26 август ҳамарӯза аз соати 15:00 то соати 21:00 ва дар хиёбони Исмоили Сомонӣ (аз буриши хиёбони Рӯдакӣ то буриши хиёбони Абуалӣ ибни Сино) аз 27 август то 7 сентябри соли 2021 аз соати 18:00 то 23:00 қатъ мегардад.

– Ҳаракати автобусҳои хатсайрҳои №29, микроавтобусҳои №19, 35 ва 58 тариқи кӯчаи Карамов, Низоми Ганҷавӣ ва ҳаракати автобуси хатсайри №22 ба воситаи хиёбони Рудакӣ ба роҳ монда мешаванд,-омадааст дар хабарнома.

Шаҳрдорӣ аз ронандагони ҳамагуна воситаҳои нақлиёти хоҳиш кардааст, ки аз кӯчаву хиёбонҳои ҳамшафат ба кӯчаи Ҳ. Шерозӣ ва хиёбони И. Сомонӣ истифода баранд.

То баргузории ҷашни 30-солагии Истиқлолияти давлатӣ дар Тоҷикистон камтар аз як моҳ мондааст. Ҷашни истиқлолиятро рақсу бозии ҳудуди 15 ҳазор донишҷӯй ва хонанда “зеб” медиҳад. Маъракаи “маршировка” ё худ тамрини рақсу роҳпаймоии хонандагон ва донишҷӯён барои таҷлили 30 солагии Истиқлолият моҳи марти соли равон оғоз шуда буд. Ин маърака ҳамеша ба вокуниш ва интиқоди волидон ва корбарони шабакаҳои иҷтимоӣ рӯ ба рӯ мешавад. Волидон мегӯянд, чунин чорабиниҳо фарзандони онҳоро аз раванди таълим дур месозанд ва ҳатто ба саломатии кӯдакон хатар доранд.

Имсол баҳси маршировка боз ҳам тундтар шуд, чунки хатари  хуруҷи коронавирус дар давраи пандемия бештар аст.

Вазорати маориф ҳамеша таъкид мекунад, ки “маршировка” ихтиёрӣ аст ва касе ба он маҷбуран ҷалб намешавад. Ҳатто вазири амориф ва илм дар нишасти охири худ, баҳси ҷалби донишҷӯён ба маршировкаро “баҳси хасакӣ” хонд.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.