Ҳар ҳафта дар барномаи “Фурсати донистан”-и радиои “Азия-Пӣюс” мо бо ҳуқуқшиносон дар мавриди масоили расмиёти маъмурӣ мусоҳибаи ихтисосӣ анҷом медиҳем. Ин бор меҳмони барнома ҳуқуқшиноси маъруф ва вакили дифоъ Иноят Иноятов буданд, ки мавзуъи имрӯз тартиби қабул кардани санадҳои маъмурӣ дар робита ба қонунигардонии дороиву маблағҳои шаҳрвандон буд.
Яъне барои қонунӣ кардани дороиҳо ва маблағҳое, ки шаҳрвандон доранд кадом ҳуҷҷатҳоро таҳия ва омода кардан зарур аст. Фишурдаи ин суҳбат, ҳар ҳафта пас аз барномаи радиоӣ дар шакли саволу ҷавоб дар сайти "Азия-Плюс" ҳам пешниҳод мешавад.
Савол: Барои қонунигардонии амволи ғайриманқул (манзил, иншоот, бино) кадом ҳуҷҷатҳо ба комиссияи қонунигардонии дороиҳо пешниҳод карда мешаванд?
Ҷавоб: Бо қарори Ҳукумати Ҷумҳурии Тоҷикистон аз таърихи 27 августи соли 2021 (таҳти №327) Номгӯи ҳуҷҷатҳои барои қонунигардонии молу мулки ғайриманқул пешниҳодшаванда тасдиқ карда шудааст. Барои қонунигардонии амволи ғайриманқул ҳуҷҷатҳои зерин пешниҳод карда мешаванд:
1) ариза дар бораи қонунигардонии дороиҳо дар ду нусха аз рӯйи намунаи шакли бо қарори Ҳукумати Ҷумҳурии Тоҷикистон тасдиқшуда;
2) ҳуҷҷати аслии ҳуқуқмуайянкунандаи пайдоиши ҳуқуқи истифодаи қитъаи замин, инчунин дар ҳолати мавҷуд будан, ҳуҷҷати ҳуқуқтасдиқкунандаи пайдоиши ҳуқуқи истифодаи қитъаи замин;
3) шиносномаи техникӣ дар ду нусха бо нақша-схемаи ошёна ба ошёнаи молу мулки ғайриманқули қонунигардонидашаванда;
4) нусхаи шаҳодатнома дар бораи додани рақами мушаххаси андозсупоранда (РМА);
5) ҳуҷҷати пардохти хироҷ барои қонунигардонӣ;
6) ҳуҷҷати тасдиқкунандаи шахсият.
ИЗОБРАЖЕНИЕ
Ба Комиссияи қонунигардонии дороиҳо ҳуҷчатҳои асл ва нусхаи ҳуҷатҳои дар Қонуни Ҷумҳурии Тоҷикистон "Дар бораи авф бинобар қонунигардонии дороиҳо ва маблағҳои шарвандони Ҷумҳурии Тоҷикистон" ва Низомномаи фаъолияти комиссия оид ба қонунигардонии дороиҳо пешбининамуда манзур карда мешаванд.
Нусхаи ҳуҷҷатҳои ба Комиссия пешниҳодшаванда бевосита дар ҷаласаи Комиссия аз ҷониби тамоми аъзои Комиссия, ки дар ҷаласа иштирок менамоянд, ба имзо расида, бо мӯҳри Комиссия тасдиқ карда мешавад. Ҳуҷатҳои аслӣ ба субъекти қонунигардонӣ баргардонида мешаванд.
Савол: Барои аз тарафи комиссияи қонунигардонии дороиҳо баррасӣ намудани аризаи қонуниигардонии амвол, ба миқдори чанд сомонӣ хироҷ пардохт карда мешавад?
Ҷавоб: Мувофиқи моддаи 8 Қонуни Ҷумҳурии Тоҷикистон "Дар бораи авф бинобар қонунигардонии дороиҳо ва маблағҳои шарвандони Ҷумҳурии Тоҷикистон", шаҳрвандоне , ки дороиҳои худро қонунӣ мегардонанд, ба андозаи даҳ нишондиҳанда барои ҳисобҳо, яъне 640 сомонӣ ба буҷаҳои маҳаллӣ хироҷ пардохт менамоянд. Пардохти хироҷи мазкур бояд, ки тавасути бонк пардохта шавад.
Савол: Муҳлати баррасӣ намудани аризаҳо оиди қонунигардонии амвол чанд рӯз мебошад?
Ҷавоб: Эъломия ва ё ариза, ки дар ҷараёни муҳлати давраи қонунигардонӣ пешниҳод гардидааст, аз ҷониби Комиссия оид ба қонунигардонии дороиҳо бояд дар муддати аз даҳ то бист рӯзи корӣ баррасӣ карда мешавад. Дар мавриди аз ҷониби Комиссия оид ба қонунигардонии дороиҳо баррасӣ накардани ариза, шаҳрванд ё шахси ҳуқуқӣ ҳуқуқ дорад, ки ба суд муроҷиат намояд.
Ин матлаб дар ҳамкорӣ бо Ҷамъиятӣ олмонии ҳамкориҳои байналмилалӣ дар доираи лоиҳаи "Шаҳрванд дар расмиёти маъмурӣ ва истеҳсолоти иҷро" омода шудааст.
