Душанбе. 17-уми январ. ОИ «Азия-Плюс» – Пас аз мулоқот бо президенти Тоҷикистон Эмомалӣ Раҳмон вазири ҳамкории байнулмилалии давлати Қатар Холид ибни Муҳаммад ал-Атия ба рӯзноманигорон изҳор дошт, ки муносиботи дуҷонибаи Тоҷикистону Қатар дар ҳоли густариши рӯзафзун қарор дошта, торафт таҳким меёбанд ва муносиботи сарварони кишварҳоро метавон чун бародарона арзёбӣ намуд.
Ба гуфтаи ӯ, дар ҷараёни мулоқот масоили рушди ҳамкориҳои дуҷониба, аз ҷумла ҷалби сармоягузории Қатар ба иқтисоди Тоҷикистон мавриди баррасӣ қарор гирифтаанд.
Вазири ҳамкории байнулмилалии Қатар зикр кард, ки Қатар ният дорад дар Тоҷикистон як қатор лоиҳаҳои сармоягузориро амалӣ созад. «Кишвари мо ният дорад, дар Тоҷикистон масҷид ва меҳмонхонаи бузургтарин дар қаламрави Осиёи Марказиро бунёд сохта, инчунин як қатор лоиҳаҳои сохтмониро татбиқ намояд», – гуфт ӯ ва афзуд, ки то ҳанӯз ҳаҷми маблағгузориҳо ба ин лоиҳаҳо муайян карда нашудаанд, зеро феълан асноди марбут ба лоиҳаҳо дар ҳоли омӯзиш қарор дошта, пас аз 2-3 моҳ тамоми ҷузъиёти он маълум хоҳад шуд.
