Душанбе. 26-уми март. ОИ «Азия-Плюс» – Субҳи имрӯз президенти Тоҷикистон Эмомалӣ Раҳмон бо сафари расмӣ озими Муғулистон шуд.
Чӣ тавре ки аз хадамоти матбуоти сарвари давлат ба ОИ «Азия-Плюс» хабар доданд, президентро дар сафар мушовири президент оид ба масоили байнулмилалӣ Эркин Раҳматуллоев, вазири рушди иқтисод ва савдо Ғуломҷон Бобозода, вазири кишоварзӣ Қосим Қосимов, раиси Кумитаи давлатии сармоягузорӣ ва идораи амволи давлатӣ Фаррух Ҳамралиев ва муовини аввали вазири умури хориҷии ҷумҳурӣ Абдулло Юлдошев ҳамроҳӣ мекунанд.
Тавре қаблан хабар дода будем, рӯзи 27-уми март нахуст мулоқоти як ба яки Эмомалӣ Раҳмон ва президенти Муғулистон Намбарин Энхбаяр ва сипас гуфтушуниди ҳайатҳои васеи ҷонибҳо баргузор мешавад.
Аз рӯи натиҷаҳои гуфтушунид имзои як қатор асноди дуҷониба дар назар аст. Ғайр аз ин, президенти Тоҷикистон бо муовини раиси парлумони Муғулистон ва муовини аввали нахуствазири Муғулистон низ дидору гуфтушунид хоҳад кард..
Шоми рӯзи 27-уми март сарвари давлати Тоҷикистон ба ватан бармегардад.
