Раисҷумҳури Тоҷикистон имрӯз, 21-уми январ бо фармонҳои худ муовини сарвазири Тоҷикистон Маҳмадтоир Зокирзода, вазири адлия Рустами Шоҳмурод, инчунин вазири меҳнат, муҳоҷират ва шуғли аҳолӣ Сумангул Тағойзодаро аз вазифа озод кард.
Маҳмадтоир Зокирзода 30-юми марти соли 2016 ба мансаби муовини сарвазир таъин шуда буд. Қаблан вазири кишоварзӣ буд. Ӯ дар рӯйхати ҲХДТ ҳамчун номзад ба вакилии Маҷлиси намояндагони Маҷлиси Олии ҶТ пешбарӣ шудааст.
Ҳамчунин номзадиҳои вазири адлия Рустами Шоҳмурод, ки ин мақомотро аз соли 2012 то имрӯз роҳбарӣ мекард ва Сумангул Тағойзода, ки 7 сол инҷониб вазири меҳнат, муҳоҷират ва шуғли аҳолӣ буд, аз рӯйхати ҲХДТ ба вакилии парлумон пешбарӣ шуданд.
Музаффар Ашӯриён, ки то ин вақт муовини якуми роҳбари Дастгоҳи иҷроияи Президенти ҶТ буд, вазири адлияи ҶТ таъин карда шуд.
Муовини вазири иқтисод ва савдо Гулрӯ Ҷабборзода вазири меҳнат, муҳоҷират ва шуғли аҳолии ҶТ таъин карда шуд.
ИЗОБРАЖЕНИЕ Маҳмадтоир Зокирзода (сеюм аз чап) дар маҷлиси васеи ҳукумат, 20-уми январи 2020 с.
Дар торнамои раисҷумҳур инчунин қарорҳои Ҳукумати ҶТ дар мавриди шахсони зерин нашр гардиданд:
Хайриддин Усмонзода бо сабаби ба кори дигар гузаштанаш аз вазифаи ректори Муассисаи давлатии таълимии «Донишкадаи давлатии фарҳанг ва санъати Тоҷикистон ба номи Мирзо Турсунзода» озод карда шуд. Ба ҷойи ӯ Муҳриддин Низомӣ таъин гардид.
Раҳматулло Мирбобоев бо сабаби ба нафақа баромаданаш аз вазифаи муовини якуми Вазири маориф ва илми Ҷумҳурии Тоҷикистон озод карда шуда ба ҷойи ӯ Муҳаммаддовуд Саломиён таъин карда шуд.
Абдулло Табарӣ бо сабаби ба кори дигар гузаштан аз вазифаи ректори Муассисаи давлатии таълимии «Донишгоҳи давлатии Кӯлоб ба номи Абӯабдуллоҳи Рӯдакӣ» озод карда шуд. Ҷойи ӯро Абдусалом Мирализода ишғол кард.
Файзалӣ Идизода бо сабаби ба кори дигар гузаштан аз вазифаи ректори Муассисаи давлатии таълимии «Донишкадаи омӯзгории Тоҷикистон дар ноҳияи Рашт» озод карда шуд. Ба ҷойи ӯ Маҳмуд Шоҳин таъин гардид.
Бо сабаби ба кори дигар гузаштан Шариф Ҳакимзода аз вазифаи мушовири бахши ёрдамчии Президенти ҶТ оид ба масъалаҳои кадрҳо ва Лутфия Абдулхолиқзода аз вазифаи сардори Раёсати илму маърифати Дастгоҳи иҷроияи Президенти ҶТ озод карда шуданд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 45 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
