Манбаъ: Ҷамшед Нурмаҳмадзода раиси Агентии омор ва Гулнора Ҳасан вазири меҳнат таъйин гардиданд

Ҳасанзода Гулнора Кенҷа, раиси Агентии омори Тоҷикистон аз вазифа озод ва ба ҷои ӯ Ҷамшед Нурмаҳмадзода, раиси пешини Бонки миллии Тоҷикистон, ки чанд сол пеш аз вазифа озод гардида буд, таъйин шудааст.

Як манбаъ дар суҳбат бо “Азия-Плюс” гуфт, тағйирот имрӯз, 5-уми январ, ба амал омад ва Гулнора Кенҷа ба ҷойи Ширин Амонзода вазири меҳнат, муҳоҷират ва шуғли аҳолӣ таъйин гардид.

Субҳи имрӯз як манбаъ аз вазорати меҳнат гуфта буд, ки Ширин Амонзода аз курсии вазирӣ озод шуд.

Ҳоло маълум нест ки Ширин Амонзода ба чӣ мансабе таъйин шудааст.

Қаблан, Абдуфаттоҳ Шарифзода, сухангӯи раисиҷумҳури Тоҷикистон дар суҳбат бо “Азия-Плюс” хабарҳо дар бораи тағйироти кадриро тасдиқ кард, вале гуфт, “ҳоло расман фармонҳоро ба даст нагирифтем ва аз ин рӯ, мушаххасан чизе гуфта наметавонем”.

Ӯ иброз дошт, ки баъди зуҳри имрӯз фармонҳо дар хусуси тағйироти кадриро дастрас ва дар сомонаи расмии президент интишор менамоянд.

Гуфта мешавад, ки дар баробари Ширин Амонзодаву Гулнора Ҳасанзода, ҳамчунин чанд мансабдори дигар низ аз вазифа озод ва чандеи дигар ба вазифаҳои нав таъйин шудаанд.

Дар хусуси тағйироти кадрӣ тафсилоти бештар нашр хоҳад шуд.

Дар Telegram, Facebook, Instagram, OK ва ВК бо мо бимонед.