Дар робита ба шарҳу тавзеҳи ҳоодисаи чанде қабл бо ҳавопаймои Боинг 737-700 рухдода имрӯз ширкати ҳавопаймоии «Тоҷк Эйр» нишасти хабарӣ доир намуд.
«Пас аз ошкор гардидани камбуди кори низоми нигоҳдории баландӣ, шоми 9-уми феврал ҳавопаймо бидуни хавфе ба майдони ҳавоии Душанбе фуруд омада, ҳамаи 136 нафар мусофирони хатсайр бо ҳавопаймои ҳамин навъи ширкат ба пойтахти Русия парвоз карданд», – изҳор кард дар ҷамъи рӯзноманигорон мудири кулли ҶСК «Тоҷик Эйр» Фирӯз Ҳамроев.
Ба қавли ӯ, дар баландии на зиёдтар аз 4,2 км низоми нигоҳдории баландии ҳавопаймо огаҳ намудааст, ки гузаштан ба баландии минбаъда ғайриимкон аст ва ҳарчанд сардори ҳайати ронандагӣ як қатор чораҳо андешида бошад ҳам, он самар надодааст ва аз ин рӯ, тасмим гирифта шудааст, ки баъди 4 соати парвоз ҳавопаймо пас аз сӯзонидани миқдори зарурии сӯзишворӣ ба фурудгоҳ баргардонида шавад.
«Ин ҳавопаймои Боинг-737-300-и ширкат 15 сол дошта, бор нахуст аст, ки дар низоми кориаш нуқсон ба мушоҳида мерасад. Мо камбудии низоми онро бартарф сохта, ба кор омода месозем. Аз рӯи ин ҳавопаймо мо тамоми пардохтҳои лизингиро анҷом дода, он пурра ба моликияти ширкат гузашт», – афзуд номбурда.
