Канибадам. 27 апрел. «Азия-Плюс» – | Раиси вилояти Суғд Қоҳир Расулзода рӯзи чоршанбе бо сокинони шаҳри Конибодом вохӯрӣ анҷом дод.
Тавре ба «АП» аз маъмурияти шаҳр хабар доданд, вохӯрӣ дар майдони киштзори ҷамъияти саҳомии Энаҷон Бойматов, бо иштироки наздики 5 ҳазор сокини шаҳр баргузор гашт. Сӯҳбати раиси вилоят бо шаҳрвандон дар чунин фазои ғайриоддӣ хеле ошкоро ва самимӣ гузашт, афзуд манбаъ.
Қоҳир Расулзода зимни баромади худ таъкид кард, ки аз 201 муроҷиатномаи сокинони Конибодом беш аз 80 % ҳали худро ёфтанд. Қисмати дигари он, ки маблағгузориро тақозо дорад то соли 2013 ҳал хоҳанд шуд.
Раиси вилоят ба ҳали мусбии мушкилоти сокинони минтақа, истифодаи дурусти заминҳои хочагидорӣ ишора карда, ба мақомоти дахлдор супориш дод то мушкили мардумро алалхусус дар масоили тақсимоти қитъаи замин барои сохтмони манзили зист ва таъмини аҳолӣ бо ҷойи кор ҳал карда шаванд. Ҳамзамон камбудиҳо дар фаъолияти корхонаҳои хусусигардондашудаи саноатӣ , коркарди маводи хом ва дигар масоил қайд карда шуд.
Дар рафти сӯҳбат сокинони шаҳр имкон пайдо карданд, то ба раиси вилоят бевосита саволи худро ироа кунанд. Дар ҷавоб Расулзода, роҳбарони мақомоти дахлдорро мувазаф кард то ба мушкили шаҳрвандон расидагӣ кунанд. Чунин мулоқоти раиси вилоят дар тамоми манотиқи Суғд гузаронда мешавад, хабар дод манбаъ.
