Ҳаракати воситаҳои нақлиёт тариқи роҳи мошингарди Душанбе – Кӯлоб – Хоруғ – Қулма – Қарақорум танҳо баъди ду ҳафтаи зери об мондани он барқрор шуд.
Рӯзи 8 июл аз ҷониби Афғонистон ярч фаромада, ба обхезӣ дар ноҳияи Дарвози Тоҷикистон боис гардид, ки бар асари он манзили сокинон хароб шуда, роҳи мошингарди пайвасткунандаи ВМК бо пойтахт низ зери об монд. Барои барқарор кардани ҳаракати нақлиёт тариқи он кӯшишҳои зиёд ба харҷ дода шуд. Гузориши тасвирии мо дар ин бора.
Баҳри дар фурсати кӯтоҳтарин барқарор намудани ҳаракати воситаҳои нақлиёт бо ин роҳ бо дастури президенти мамлакат ҳафтаи гузашта ҳатто якчанд адад техника аз майдони сохтмони нерӯгоҳи Роғун ба Дарвоз фиристода шуд.
Кор дар се баст ба роҳ монда шуд. Агар қитъаи роҳи зериобмондаи назди деҳаи Хустав дар ду рӯз барқарор шуда бошад, пас барои барқарор кардани қитъаи зериобмонда миёни деҳаҳои Ширговад ва Ёгед якчанд маротиба анҷоми корҳои таркиш ва кашонидани миқдори зиёди сангу хок лозим омад.
Рӯзи 24 июл, баъди 15 рӯзи ҳодиса бо талошҳои муштараки Вазорати нақлиёт, мудофиа, Кумитаи ҳолатҳои фавқулода, раҳбарияти вилоят ва ноҳия, низомиёни рус ва бинокорони Чин муяссар шуд, ки ҳаракат тариқи ин роҳ, ки бевосита Тоҷикистонро бо Чин мепайвандад, барқарор карда шавад.
Вале ин аллакай он роҳи пешина нест, зеро то ҳол қисмати зиёдаш зери об мондааст. Ба ивази он роҳи муваққатӣ сохта шудааст. Бинокорон кӯҳпораҳоро тарконида, қитъаро холӣ ва онро бо хок пӯшониданд. Ҳамин тавр, роҳи муваққатӣ ба вуҷуд омад. Айни замон автомашинаҳо бо он равуо доранд.
ИЗОБРАЖЕНИЕ
