Дар Хуҷанд низоми City Card ба кор даромад. Акнун роҳкиро дар нақлиёти ҷамъиятиро метавон тариқи корт пардохт кард. Ин дуюмин шаҳре дар кишвар пас аз Душанбе аст, ки пардохти ғайринақдӣ роҳандозӣ шудааст.
“Лоиҳаи низоми пардохти электронӣ дар шаҳри Душанбе зиёда аз ду сол аст, ки бомуваффақият амалӣ гашта истодааст. Ва беҳуда нест, ки он акнун дар шаҳри Хуҷанд ҷорӣ мешавад – ин дуввумин шаҳри калонтарин дар ҷумҳурӣ аст”, – мегӯяд роҳбари лоиҳаи City Card Ҷомӣ Шарипов.
Бо корт автобусҳо кор мекунанд, ки шуморашон дар шаҳр ба 100 адад мерасад. Аҳолии Хуҷанд қариб 200 ҳазор ва маҳаллаҳои гирду атрофи он 1 млн нафар аст. City Card равуои мусофиронро ба тартиб меорад: даромадан ба автобус – танҳо аз дари пеш ва берун шудан – аз дарҳои мобайну қафо. Дар қисмати пеши автобус барои дароз кардани пули роҳкиро бесарусомонӣ ба вуҷуд намеояд.
“Барои ронанда роҳат аст, бақия намекобӣ, одамон худашон кортро зада медароянд. Ҳушу фикри мо танҳо дар роҳ мешавад”, -мегӯяд ронандаи автобус Абдукарим Шокиров.
Низоми нав барои пулро ба киса задани ронанда имкон намедиҳад. Ин – мушкили дигарро низ аз байн мебарад–ронанда фикри пулро намекунад, дар истгоҳ бисёр тавққуф намекунад, зиёд одам намегирад. Мусофирон низ аз навгонӣ хуш истиқбол мекунанд.
ИЗОБРАЖЕНИЕ
“Кортро 10 сомонӣ харидам, дарунаш 6 сомонӣ буд. Хеле роҳат аст. То “Сомон Бозор” бо пули нақд 1,5 сомонӣ медодем, бо корт бошад роҳкиро 1 сомонӣ аст”, – мегӯяд сокини Хуҷанд Саидҷон Зокиров.
“Барои бачаҳо низ хуб аст, – илова мекунад сокини дигари шаҳр Мавзунахон Ғаффорова. – Ба бачаҳо 50% тахфиф дода мешавад. Инчунин пули нақду танга дар киса дигар намегардонанд. Ин қулай ва осон аст”.
CityCard хати магнитӣ дорад ва онро метавон ҳамчун корти бонкӣ истифода кард – нигаҳдории маблағ, интиқол ба кортҳои дигар, гирифтани интиқоли маблағ, пардохти харид дар мағозаҳо. Инчунин бо пайваст шудан ба ҳамён метавон даҳҳо намуди дигари хизматрасониҳоро пардохт намуд.
ИЗОБРАЖЕНИЕ
Кортҳо дар Хуҷанду Душанбе якхела мебошанд. Онҳоро метавон дар ҳар ду шаҳр истифода бурд. Дар пойтахт ин низом соли 2018 роҳандози шуда буд – аввал дар автобусу троллейбусҳо, ҳоло бошад ба он микроавтобусҳо мегузаранд.
“Низоми электронӣ пойгоҳи нағз барои таҳлилҳои гуногун мебошад. Таҳлил аз рӯйи тарофаҳо, таҳлил аз рӯйи шумораи имтиёздорони нақлиёти ҷамъиятӣ – то ин дам ҳама ин гуна таҳлилҳо тақрибан ҳисоб карда мешуданд”, – мегӯяд роҳбари лоиҳаи City Card Ҷомӣ Шарипов.
Ояндаи наздик дар Хуҷанд боз автобусу микроавтобусҳои нав харидорӣ ва ба равуо оғоз мекунанд, ки онҳо низ бо City Card кор хоҳанд кард.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
