Тоҷикистон ба вуруди шаҳрвандони хориҷӣ ба кишвар бе натиҷаи тест иҷоза медиҳад, лекин онҳо бояд бо худ маълумотнома дар бораи ваксинагирӣ зидди коронавирус дошта бошанд, хабар дод ба “Азия-Плюс” сардори Раёсати бехатарии санитарӣ-эпидемиологӣ, ёрии таъҷилӣ ва фаврии тиббии Вазорати тандурустӣ Наврӯз Ҷаъфаров.
“Шаҳрвандоне, ки ваксина гирифтаанд, бо пешниҳоди маълумот дар бораи ваксинзанӣ ба Тоҷикистон ворид шуда метавонанд. Аммо агар шаҳрванди хориҷӣ 2 ё 3 ҳафта пеш ваксина гирифта бошад, ӯро лозим меояд, ки тест супорад. Агар аз замони ваксинагирӣ як моҳ ё зиёдтар аз он муҳлат гузашта бошад, натиҷаи тест талаб намешавад”, – гуфт ӯ.
Шаҳрвандони хориҷӣ, ки зидди COVID-19 ваксина нагирифтаанд, мисли пештара бояд бо худ маълумотномаи ташхиси сироят надоштан аз коронавирусро дошта бошанд, ки на дертар аз 72 соат (се шабонарӯз) то замони убури марз дода шудааст. Барои кӯдакони синни то 3-сола чунин маълумотнома талаб намешавад.
Ҷаъфаров қайд кард, ки тайи ду моҳи охир дар кишвар ягон ҳолати сироят аз коронавирус ба қайд гирифта нашуда, инчунин штаммҳои нави африқоиҷанубӣ ва бритониёии ин вирус дар Тоҷикистон ҷой надорад.
Ёдрас мекунем, ки Тоҷикистон барои ваксиназании гурӯҳҳои афзалиятноки аҳолӣ мувофиқи тақсимоти ваксинаҳои зидди коронавирус бо ташаббуси COVAX 732 ҳазор воя (доза)-и ваксинаи AstraZeneca/Oxford мегирад.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
