Сайдулло Малайзода, сардухтури беморхонаи марказии ноҳияи Дӯстӣ дар вилояти Хатлон, маблағи барои хариди дорувории беморон дар соли сипаришуда ҷудошударо ба чолиш кашида, гуфтааст, “ба ҳар бемор дар як рӯз 95 дирам то 1 сомонӣ” аст. Аммо масъулони Раёсати молияи ноҳия ин иддаои сардухтурро рад мекунанд. Дар ин бора ҳафтаномаи “Фараж” иттилоъ медиҳад.
Ин ҳафтанома навиштааст, ки маблағгузории кам барои харидании ғизо ва доруи беморон аз буҷети маҳалии ноҳияи Дӯстӣ масъулони беморхонаи марказии ноҳияро нигарон кардааст.
Нашрия бо такя ба гуфтаи сардухтури беморхона навиштааст, ки “соли 2022 барои хариди дорувории беморон аз ҳисоби буҷети ноҳия ҳамагӣ 29 ҳазор сомонӣ ҷудо шуда буд, ки ба ҳар бемор дар як рӯз хеле кам, яъне 95 дирам то 1 сомонӣ, рост меомад”.
“Камаш 300-400 ҳазор сомонӣ бояд барои доруворӣ ҷудо карда шавад, зеро соли гузашта барои як беморамон мо 40 ҳазор сомонӣ масраф кардем ва ҳоло беморхона аз Маркази хуни вилоят 35-40 ҳазор сомонӣ ва аз дорухонаи №4-и шаҳри Бохтар 10 ҳазор сомонӣ қарздор аст”, – гуфтааст Сайдулло Малайзода.
Сартабиби беморхона иттилоъ додааст, ки имсол барои дорувории беморон аз ҳисоби буҷети ноҳия бо талошҳои зиёд ҳамагӣ 75 ҳазор сомонӣ ба нақша гирифтанд.
ИЗОБРАЖЕНИЕ Сайдулло Малайзода
Ӯ таъкид кардааст ки, “аз ин маблағ дар се моҳи соли 2023-юм 10 ҳазор сомонӣ барои харидани плёнкаи рентген ва хлор гирифтанду халос”.
Сайдулло Малайзода бо нигаронии хос гуфтааст, ки “барои хӯрокворӣ имсол 35 ҳазор сомонӣ аз ҳисоби буҷети ноҳия ба нақша гирифта шудаст, ки ин ҳам кифоя нест. 40 дарсади маблағҳои қарори №600-ро барои хариди доруворӣ ҷудо мекунем, аммо, мутаассифона, дар беморхона беморон бистарӣ намешаванд. Зеро дар се моҳи соли ҷорӣ иҷроиши қарори №600 дар умум 25 фоиз иҷро шудасту халос”
Бояд гуфт, қарори ҳукумати ҷумҳурӣ аз 2-юми декабри соли 2008, таҳти рақами №600 “Дар бораи тартиби хизматрасонии тиббию санитарӣ ба шаҳрвандони Ҷумҳурии Тоҷикистон дар муассисаҳои системаи давлатии тандурустӣ” ҳаҷми пардохт барои табобату ташхисро муайян мекунад.
Аммо дар ин ҳол, сардори Раёсати молияи ноҳияи Дӯстӣ Сайднизомиддин Самадзода дар сӯҳбат бо ҳафтанома гуфтаҳои сардухтури беморхонаи марказиро рад кардааст.
ИЗОБРАЖЕНИЕ Сайднизомиддин Самадзода
Самадзода гуфтааст, дар соли 2022 аз ҳисоби буҷети ноҳия дар умум барои соҳаи тандурустӣ 539 ҳазору 307 сомонӣ ва хӯрокворӣ 50 ҳазору 500 сомонӣ ба нақша гирфита шуда буд, ки он пурра маблағугузорӣ шуд.
“Аз ин маблағҳо барои харидории доруворӣ ба беморхонаи марказӣ 102 ҳазору 030 сомонӣ ва 29 ҳазор барои ғизо ба нақша гирифта шуда буд”, – афзуда Самадзода.
Ба иттилои ӯ, “дар соли 2023 барои харидории доруворӣ ба соҳаи тандурустӣ дар буҷети ноҳия дар ҷамъ 603 ҳазору 700 сомонӣ ва барои хӯрокворӣ 54 ҳазор сомонӣ ба нақша гирифта шудааст”.
“Суоли матраҳ ин аст, ки сардухтури беморхона рост мегӯяд ё сардори Раёсати молияи ноҳияи Дӯстӣ?”, – менависад ҳафтаномаи “Фараж”.
